Канадаликларнинг ярмидан кўпи энди АҚШни Россия, Эрон ёки Шимолий Кореядан ҳам кўпроқ ўз мамлакати учун асосий таҳдид сифатида кўрмоқда. Бу ҳақда Pew Research Center тадқиқот марказининг янги тадқиқотида маълум қилинган.
Сўров натижаларига кўра, Канада фуқароларининг 59 фоизи АҚШни жиддий хавф деб ҳисоблайди. Бу Дональд Трампнинг Канада АҚШнинг “51-штати”га айланиши кераклиги ҳақида тобора кўпроқ айтаётган сўзлари фонида ўсиб бораётган ташвишни акс эттиради. Канада ҳукуматининг бир неча бор қилган илтимосларига қарамай, президент Трамп Канаданинг эртами-кечми АҚШнинг бир қисмига айланишини таъкидлашда давом этмоқда.
Оқ уй раҳбарининг сўнгги йиллардаги ташқи сиёсати ҳатто иттифоқчиларига нисбатан ҳам савдо божлари билан таҳдид қилиш, Эронга ҳужумлар уюштириш ва Гренландияни сотиб олиш истаги ҳақидаги баёнотларни ўз ичига олган.
Канада Вашингтон сиёсатидан хавотирда бўлган ягона давлат эмас. Трампнинг биринчи президентлик кампаниясиданоқ анъанавий нишонига айланган Мексикада сўровда қатнашганларнинг 68 фоизи АҚШни асосий таҳдид деб атаган.
“Шунга қарамай, канадаликларнинг ярмидан кўпи ҳали ҳам АҚШни асосий иттифоқчи деб билади. Бу муносабатнинг икки томонламалигини кўрсатади. Оқ уй ҳаракатларидан хавотирланиш унга қарамликни англаш билан уйғунлашади”, деб таъкидлайди тадқиқот муаллифлари.
Европада таҳдидни идрок этиш бутунлай бошқача. У ерда, айниқса Украинада давом этаётган уруш фонида, асосий хавф ҳамон Россия ҳисобланади. Польшада респондентларнинг 81 фоизи Москвани асосий хавф деб атаган, Швецияда эса бу кўрсаткич 77 фоизни ташкил этган. Шу билан бирга, Европадаги ўнг партиялар тарафдорлари орасида Россияни хавфли деб ҳисобловчилар сезиларли даражада камроқ эканлигини Pew Research аниқлаштирган.
Сўров 25 мамлакатда 28 мингдан ортиқ киши ўртасида ўтказилган. АҚШга энг содиқ давлатлар орасида Исроил етакчилик қилмоқда — унинг 95 фоиз фуқароси Американи ўзининг асосий иттифоқчиси деб атаган. Кейинги ўринларда Жанубий Корея (89 фоиз) ва Япония (78 фоиз) жойлашган.
Изоҳ (0)