АҚШ 36 та давлат фуқаролари учун мамлакатга кириш чекловларини жорий этмоқчи. Бу ҳақда давлат департаменти ҳужжатлари билан танишган The Washington Post хабар бермоқда.
Рўйхатга Африканинг 25 давлати, жумладан, Миср ва Жибути каби АҚШ ҳамкорлари, шунингдек, Кариб денгизи, Тинч океани минтақасидаги давлатлар киритилган. Марказий Осиё минтақасидан Қирғизистон ушбу рўйхатдан жой олган.
Шунингдек, Ангола, Антигуа ва Барбуда, Бенин, Бутан, Буркина Фасо, Кабо Верде, Камбожа, Камерун, Конго, Доминика, Эфиопия, Габон, Гамбия, Гана, Кот дʼИвуар, Либерия, Малави, Мавритания, Нигер, Нигерия, Сент Киц ва Невис, Сент Люсия, Сан Томе ва Принципи, Сенегал, Жанубий Судан, Сурия, Танзания, Тонга, Тувалу, Уганда, Вануату, Замбия ва Зимбабве каби давлатлар рўйхатга киритилгани айтилмоқда.
“Бу ташаббус Трамп маъмуриятининг иммиграция сиёсатини кучайтиришида янги босқич бўлади”, дейилади хабарда.
Давлат котиби Марко Рубио томонидан имзоланган ва америкалик дипломатларга юборилган ҳужжатга кўра, юқорида тилга олинган давлатлар ҳукуматларига давлат департаментининг янги талабларини бажариш учун 60 кун муҳлат берилган.
Ҳужжатда айтилишича, бу давлатлар бир қатор мезонларга жавоб бермайди. Айримларида ишончли ҳужжатларни берувчи ваколатли органлар йўқ ёки кенг фирибгарлик ҳолатлари кузатилмоқда. Шунингдек, ушбу мамлакатларнинг кўплаб фуқаролари АҚШда бўлиш муддатига риоя қилмайди.
Нашрнинг ёзишича, давлат департаменти вакили расмий ҳужжатларга изоҳ беришдан бош тортган. Оқ уй ҳам бунга изоҳ бермаган.
Дональд Трамп 9 июндан 12 давлат фуқароларига АҚШга киришни бутунлай тақиқлаганди. Улар қаторида Афғонистон, Чад, Конго, Экваториал Гвинея, Гаити, Сомали ва Эрон бор эди. АҚШ президенти, шунингдек 7 та давлат (Бурунди, Куба, Лаос, Серра Леоне, Того, Туркманистон, Венесуэла) фуқаролари киришини қисман чекловчи фармонни имзолади.
Трамп 2023 йил октябрида Ғазо сектори, Ливия, Сомали, Сурия, Яман ва хавфсизликка таҳдид соладиган бошқа давлатлар фуқароларига АҚШга киришни тақиқлашини айтган эди.
Изоҳ (0)