Покистон ҳукумати АҚШ президенти Дональд Трампни Ҳиндистон билан низони ҳал этишдаги воситачилиги учун 2026 йилги тинчлик бўйича Нобель мукофотига номзод этиб кўрсатди. Бу ҳақда Покистон ҳукуматининг Х ижтимоий тармоғидаги расмий саҳифасида маълум қилинган.
Исломободнинг фикрича, айнан Америка раҳбарининг ҳаракатлари вазиятнинг кескинлашувини тўхтатишга ёрдам берди ва уни барқарорлаштиришда ҳал қилувчи рол ўйнаган.
“Покистон ҳукумати президент Дональд Трампни яқинда бўлиб ўтган Ҳиндистон—Покистон инқирози пайтидаги қатъиятли дипломатик аралашуви ва етакчилигини эътироф этган ҳолда 2026 йилги тинчлик бўйича Нобель мукофотига расман тавсия этишга қарор қилди”, дейилади хабарда.
Шунингдек, Покистон ҳукумати АҚШ президенти бир вақтнинг ўзида ҳам Исломобод, ҳам Нью Деҳли билан дипломатик йўл орқали мулоқот қилиб, “катта стратегик узоқни кўра билиш ва ажойиб давлат донолигини намойиш этганини” таъкидлаган.
7 майга ўтар кечаси Ҳиндистон армияси “Покистондаги террорчилик инфратузилмасига қарши” “Синдур” операциясини бошлаганини эълон қилди. Ҳиндистон ва Покистон ўртасидаги можаронинг кескин тус олишидан олдин Жамму ва Кашмир иттифоқдош ҳудудидаги Анантнаг тоғли туманида жойлашган Пахалгамда теракт содир бўлган эди. Ушбу ҳудуд Британия Ҳиндистони бўлинганидан бери Нью Деҳли назорати остида, аммо Покистон ҳам унга даъвогарлик қилмоқда.
22 апрель куни Ҳиндистонда террорчилик ташкилоти деб тан олинган “Қаршилик фронти”га мансуб қуролланган шахслар у ерда 20 дан ортиқ одамни отиб ўлдирган. Нью Деҳли Исломободнинг воқеага алоқадорлигини маълум қилди, Покистон ҳукумати эса буни рад этди.
Бу Трампнинг ушбу нуфузли мукофотга номзод сифатида кўрсатилиши биринчи марта эмас. Хусусан, 2021 йилда Оқ уй раҳбари сўнгги 30 йил ичида янги урушларни бошламаган биринчи АҚШ президенти сифатида номзодлар қаторига киритилган эди.
Дональд Трампнинг ўзи аввалроқ тинчлик бўйича Нобель мукофотига лойиқ эканини, бироқ уни ҳеч қачон ололмаслигини айтган эди.
Изоҳ (0)