Теҳрон, агар халқаро босим кучайса, МАГАТЭ (Халқаро атом энергияси агентлиги) билан ҳамкорликни тўхтатиши ва ташкилот инспекторларини мамлакатдан чиқариб юбориши мумкин. Бу ҳақда Эрон олий раҳнамоси Али Хоманаийнинг маслаҳатчиси Али Шамхоний маълум қилди.
Шамхонийга кўра, АҚШ томонидан таҳдидлар давом этса, Эрон ўз ядровий фаолиятини ҳимоя қилиш мақсадида “сиёсий тийиб турувчи чораларни” қўллашга мажбур бўлади.
“Бойитилган ядровий материалларни Эрон ичкарисидаги яширин ва хавфсиз жойларга кўчириш масаласи ҳам кун тартибида бўлиши мумкин”, дея таъкидлади у.
Мазкур баёнот Дональд Трамп Эронга қарши ҳарбий куч қўллаш эҳтимолини яна тилга олганидан сўнг эълон қилинди. АҚШ президенти Теҳрон ядровий келишувга рози бўлмаса, музокаралар тўхташи ва бу Эрон учун “катта хавф туғдириши” мумкинлигини билдирган.
АҚШ ва Эрон дипломатлари 12 апрель куни Уммонда ядро дастури юзасидан музокараларни бошлаши кутилмоқда. Трамп бу борада якуний қарор ўзи томонидан қабул қилинишини билдирган. Оқ уй музокаралар бевосита олиб борилишини маълум қилган бўлса-да, Эрон томони жараён Уммон ташқи ишлар вазири воситачилигида билвосита кечишини таъкидлаган.
Маълумот учун, 2015 йилда Эрон ядро дастури бўйича Ғарб давлатлари билан келишувга эришган ва бунинг эвазига халқаро санкцияларнинг бир қисмидан халос бўлган эди. Бироқ Дональд Трамп президентлик даврида Қўшма Штатларни келишувдан чиқариб, кенг кўламли санкцияларни тиклаган. Шундан сўнг Эрон ядровий фаолиятини кенгайтирган.
МАГАТЭ маълумотларига кўра, ҳозирда Теҳрон уранни бойитиш бўйича келишувда белгиланган лимитлардан анча ошган. Ғарб давлатлари Эронни яширин тарзда оммавий қирғин қуроллари ишлаб чиқишга уринишда айблайди. Теҳрон эса ядро дастурининг фақат тинч мақсадларга йўналтирилганини таъкидлаб келмоқда.
Изоҳ (0)