AQSH Kongressi Vakillar palatasi a’zosi Aleksandriya Okasio-Kortes Eronga qarshi zarbalari sabab prezident Donald Trampga nisbatan impichment masalasini kun tartibiga olib chiqdi. Uning ta’kidlashicha, Oq uy rahbari Kongress ruxsatisiz harbiy kuch qo‘llash bilan konstitutsiyani qo‘pol ravishda buzgan.
Nima bo‘ldi?
Bugun, 22-iyun kuni erta tongda Qo‘shma Shtatlar Eronning uchta yadroviy inshooti, jumladan, Fordo obyektiga zarba berdi. Fox News telekanaliga ko‘ra, hujumda 3 ta B-2 Spirit strategik bombardimonchilari qo‘llangan. Shuningdek, yana ikkita nishonga suvosti kemalaridan Tomahawk qanotli raketalari orqali zarba berilgan. CNN esa mazkur amaliyotga 3 emas, 6 ta strategik bombardimonchi jalb etilganini ma’lum qildi.
Oradan ko‘p o‘tmay, Donald Tramp Oq uyda turib amerikaliklarga murojaat qildi. U, shuningdek, “Eron endi tinchlikni tanlashi kerakligini, aks holda keyingi hujumlar bundan ham kattaroq va ancha oson bo‘lishi”ni ta’kidladi.
Tarafdorlari uning bu harakatlarini ma’qullasa-da, boshqalar Eronga zarba mintaqaviy urushga olib boruvchi eskalatsiya bo‘lishidan xavotirda.
“Prezidentning ruxsatsiz ravishda Eronni bombardimon qilgani — Konstitutsiya va urush vakolatlari to‘g‘risidagi qonunning og‘ir buzilishi hisoblanadi. U butun bir avlodni qamrab olishi mumkin bo‘lgan urush xavfini o‘ylamay boshladi. Bu mutlaqo va aniq impichmentga asos bo‘ladi”.
Axios nashrining o‘zi tanishgan xatga tayanib xabar berishicha, yaqin kunlarda impichment uchun mablag‘ yig‘ish kampaniyasi boshlanadi.
Endi nima bo‘ladi?
2024-yilgi prezidentlik saylovida mag‘lub bo‘lgandan so‘ng demokrat siyosatchilarning aksariyati parda ortiga o‘tdi. Biroq partiyaning eng faol va progressiv yetakchilaridan biri Okasio-Kortes impichment masalasida tashabbusni o‘z qo‘liga olmoqchi. Demokratlarning Kongressdagi yetakchisi ham uning fikrlarini dastakladi.
“Tramp harbiy kuch qo‘llash uchun Kongressdan ruxsat olishga urinmadi va bu bilan AQSHni Yaqin Sharqdagi halokatli urushga tortilishdek xavf bilan yuzlashtirdi”, degan Hakim Jeffris o‘z bayonotida.
U, shuningdek “bir tomonlama harbiy harakati natijasida yuzaga keladigan har qanday salbiy oqibat uchun javobgarlik to‘liq Donald Trampning zimmasiga yuklanishi”ni qo‘shimcha qildi.
Izoh (0)