Жанубий Африкада жойлашган супермаркетлардан бирига ёввойи шер кириб келиб, дўкон ичида ваҳима келтириб чиқарди. Воқеа Лимпопо провинциясида содир бўлган.
Воқеа дўкон ичидаги кузатув камераларига ёзилган: йирик шер гўшт маҳсулотлари бўлимига йўл олган ва айнан колбаса солинган растани ағдариб юборган. Ҳайвон ҳеч кимга ҳужум қилмаган, бироқ унинг кутилмаганда пайдо бўлиши харидорлар ва ходимлар орасида ваҳима уйғотган. Айрим кишилар эшик томон қочган, бошқалар эса жавонлар орқасига яширинишга уриниб, ҳолатни телефон камерасига туширишга ҳам улгурган.
Шу ҳудуддаги Ёввойи табиатни муҳофаза қилиш маркази ходимлари зудлик билан чақирилиб, шер жойида тинчлантирувчи восита ёрдамида тутиб олинган. Сўнгра у махсус транспорт воситасида яқин атрофдаги қўриқланадиган ҳудудга олиб чиқилиб, эркинликка қўйиб юборилган.
Мутахассисларнинг дастлабки тахминларига кўра, бу шер яқин атрофдаги миллий боғ ёки ёввойи ҳудуддан йўлини адаштириб чиқиб кетган. Айрим маҳаллий ахборот воситалари, эҳтимол, озиқ-овқат излаб одамлар яшайдиган ҳудудга тушиб келган бўлиши мумкинлигини билдирган.
Жанубий Африкада бундай ҳолатлар вақти-вақти билан рўй беради. Айниқса, миллий боғлар яқинида жойлашган ҳудудларда ҳайвонлар овқат қидириб аҳоли пунктларига тушиб келиши ҳолатлари аввал ҳам кузатилган. Мутасаддилар бундай вазиятларда хотиржамликни сақлаш, ҳайвонга яқинлашмаслик ва зудлик билан тегишли ташкилотларга мурожаат қилишни тавсия қилади.
Изоҳ (0)