Хитойнинг Сичуан провинциясида яшовчи 35 ёшли Мин Хенцай иш ва никоҳдан ҳафсаласи пир бўлгач, ғорда яшай бошлади. South China Morning Post ёзмоқда.
Илгари Хенцай шаҳарда кунига 10 соатдан такси ҳайдовчиси бўлиб ишлаган ва бу фаолият унга ойига тахминан 1400 доллар даромад келтирган. Қариндошлар олдидаги қарздорлик туфайли у кўп ишлаши керак эди.
Унинг сўзларига кўра, у кредит ташкилотларига ҳам 42 минг доллар қарздорлиги бўлган. Охир-оқибат қариндошлари унинг мол-мулкини сотиб юборганини билгач, қарзларини тўлай олмаслигини тушуниб етди. Шундай қилиб, 2021 йилда Мин ўз ватанига қайтиб, ёлғиз ҳаёт тарзини бошлашга қарор қилди.
Эркак ўзининг ер участкасини қишлоқдошининг кичикроқ участкасига алмаштирди ва ёнидаги ғордан фойдаланиш имкониятига эга бўлди. 50 квадрат метрлик ғордаги уйини жиҳозлаш учун у 6000 доллар сарфлаган.
Ҳар куни Хенцай эрталаб соат 8 да уйғонади ва бутун кунни китоб ўқиш, сайр қилиш ҳамда полизда ишлаш билан ўтказади, шунингдек, 40 минг обуначига эга бўлган блог юритади. Соат ўн иккиларда ухлашга ётади. Унинг овқатланиш рационига асосан ўзи етиштирган сабзавотлар киради.
Эркак ўз уйини ҳазил тариқасида “қора туйнук” деб атайди ва шаҳарда яшаб, ишлаганида айнан шундай ҳаёт тарзини орзу қилганини тан олади.
Хенцай ишни бемаъни машғулот деб ҳисоблайди. Шунингдек, у уйланишни истамайди, чунки у никоҳни “вақт ва пулни беҳуда сарфлаш” деб ўйлайди. “Ҳақиқий муҳаббатга дуч келиш эҳтимоли жуда кам. Нега мен шундай ноёб нарса учун астойдил меҳнат қилишим керак”, деди у.
Изоҳ (0)