Австралия кутубхоналарида деярли тирик мушуклардан ажратиб бўлмайдиган юмшоқ робот мушуклар пайдо бўлди. Уларнинг аллергия қўзғатмайдиган мўйнаси, силикон панжалари, ялтираб турадиган кўзлари ва ҳаттоки юрак уришини эслатувчи махсус функцияси бор. Улар гап-сўзга овоз билан жавоб қайтаради, тегилса, ҳаракатланади ва миёвлайди. Бу ноодатий қурилмалар аллақачон болалар ва кексалар қалбини забт этмоқда.
Спрингвуд шаҳридаги кутубхона ишчилар полга махсус қутичани қўйганда, болалар доим ҳайратда қолади. Қутидан ҳақиқий мушукка ўхшаган жонзотлар чиққанда уларнинг кулгиси бутун кутубхонага таралади. Болалардан бири мўйнали роботларни “дунёдаги энг кулгили нарса” деб атаган.
Кексалар учун эса кутубхонага келиш — ёлғизликдан чалғишнинг бир йўли. Янги мўйнали меҳмонлар қариялар учун шунчаки кўнгилочар гаджет эмас, балки дам олиш, суҳбат қуриш учун дўстга айланган. Ходимларнинг айтишича, кўплаб инсонлар сунъий интеллектли мушуклар билан қизиқиб мулоқот қилади, уларга саволлар беришади.
Бундай роботлар махсус конференциядан кейин маҳаллий кутубхоналарга келиб тушди. Кенгаш вакиллари ушбу қурилмалар ҳиссий жиҳатдан қандай ёрдам бериши мумкинлигини кўришди ва ўзларида синаб кўришга қарор қилишди. Ишлаб чиқарувчи Хитойнинг Элепҳант Роботиcс компанияси бўлиб, у ҳақиқий мушук ёки итларга ғамхўрлик қилиш имкониятига эга бўлмаган ёлғиз одамлар ва қариялар учун шунга ўхшаш уй ҳайвонларини ишлаб чиқаради. Роботларда аллергия келтириб чиқарадиган жун йўқ, уларни овқатлантириш ёки сайр қилдириш шарт эмас. Асосийси, роботлар ўзларини ҳақиқий уй ҳайвонлари каби тутишади.
Шунингдек, робот ҳайвонлар сўзлашишда қийналаётган болалар учун ҳам фойдали бўлиши мумкин. Психологлар айтишича, робот ҳайвонлар болаларнинг мулоқотга очилишга, эътибор ва қўллаб-қувватлашни ҳис қилишга ёрдам беради. Бошқа мамлакатларда ҳам бу ёқимли қурилмаларни даволашда қўллаш ҳолатлари кузатилмоқда. Масалан, АҚШда Женни лақабли электрон кучукчага талаб катта. Айниқса деменцияга чалинган инсонлар уни жуда яхши кўриб қолган.
Австралияда бошланган тажриба шуни кўрсатдики, бундай сунъий ёрдамчилар турли ёшдаги инсонларнинг ижтимоий ва эмоционал эҳтиёжларини қондиришда самарали бўлиши мумкин. Келажакда улар нафақат кутубхоналарда, балки мактаблар, қариялар уйи ва ҳатто тиббиёт муассасаларида ҳам кенг қўлланиши мумкин.
Изоҳ (0)