Ўзбекистон–Қирғизистон–Хитой–Мўғулистон коридори бўйлаб биринчи пилот юк ташуви муваффақиятли амалга оширилди. Бу ҳақда Транспорт вазирлиги хабар берди.
Қайд этилишича, мамлакатлар тадбиркорлари томонидан ишлаб чиқарилган маҳсулотларни янги бозорларга олиб чиқиш, автомобиль транспортида янги коридорларда юк ташувларини йўлга қўйиш мақсадида Транспорт вазирлиги Савдо-саноат палатаси билан ҳамкорликда Ўзбекистон–Қирғизистон–Хитой–Мўғулистон коридори бўйлаб биринчи пилот юк ташувини ташкил этди.
Мураккаб релефли Олтой тоғлари бўйлаб ўтган мазкур коридор айрим қисмлари денгиз сатҳидан 1500 метр баландликкача кўтарилади. Ўзбек миллий ташувчиси томонидан 4500 км масофа 8 кунда босиб ўтилди.
Ўзбекистон—Қирғизистон—Хитой—Мўғулистон коридори бўйлаб 5 июнь куни биринчи пилот юк ташуви ташкил этилган.
Таъкидланишича, бу йўналиш давлатлар ўртасида экспорт ва импорт юк ташувлари ҳажмини оширишга, савдо алоқалари географиясини кенгайтиришга ҳамда товарларни етказиб бериш муддатларини қисқартиришга хизмат қилади.
Дунё логистика бозоридаги вазиятни инобатга олганда, мазкур коридорнинг ривожланиши ўзбек миллий ташувчилари учун ўз бизнесини кенгайтириш, самарадорликни ошириш ҳамда минтақавий ва глобал даражадаги ўринларни мустаҳкамлашда муҳим аҳамиятга эга.
Коридорнинг йўналиши ва мақсади
Янги транспорт йўлаги Ўзбекистондан Қирғизистон орқали Хитойга, сўнгра Мўғулистонга ўтади. Бу йўл Евросиё минтақасида юк ташишнинг муқобил ва самарали йўналишини тақдим этади, айниқса Хитой ва Мўғулистон бозорларига чиқиш имкониятларини кенгайтиради.
Изоҳ (0)