Хитой интернет-дўконларида Пекин университети қошидаги кўлдан олинган “ақл-идрокка тўла” бутилкадаги сув сотила бошланди. Сотувчиларнинг таъкидлашича, у ғайриоддий хусусиятларга эга ва ҳатто кайфиятга таъсир қилиши мумкин. Бу ҳақда China Morning Post хабар берди.
Пекин университети Хитойнинг энг нуфузли таълим муассасаларидан бири бўлиб, жаҳон рейтингида 14-ўринни эгаллайди. Унинг ҳудудида ўзининг Веймин кўли мавжуд.
Сўнгги пайтларда сув ҳавзаси сотувчиларнинг рекламалари туфайли айниқса машҳур бўлди. Тадбиркорларнинг таъкидлашича, у ердан чиқаётган сув ғайриоддий хусусиятларга эга: кайфиятга таъсир қилиши, “ақлни чархлаши” ва умумий ҳолатни яхшилаши мумкин. Сотувчилар ишончлилик учун сув йиғиш жараёни акс этган видеони жойлаштиради ва харидорларга тасвирга олинган материални юборади.
Шу билан бирга, улар харидорларга сувни ичмасликни, фақат уни безак сифатида ёки гулларни суғориш учун ишлатишни маслаҳат беришади. “Веймин кўлининг суви мўжизавий тарзда турли ўсимликларнинг ўсишига ёрдам беради. Агар уни хонангизга қўйсангиз, у намлик даражасини тартибга солишга ёрдам беради”, — дейилади дўкон рекламасининг бирида.
Баъзи эълонларда янада қизиқарли таклифлар ҳам бор. Масалан, сотувчилар кўл яқинида йиғилган тупроқни сув билан бирга сотиб олишни таклиф қилишади: 600 грамм учун 14 доллар тўлаш керак. Университет кампуслари ҳудудидан олинган оддий ерни ҳам сотиб олиш мумкин, у 900 грамм учун 18 долларга тушади.
Бундан ташқари, баъзи тадбиркорлар ўз маҳсулотларини ўқитувчиларнинг имзолари билан тўлдирадилар, бу эса нархни дарҳол оширади. Бироқ университет раҳбарияти эълонларга аллақачон муносабат билдириб, Веймин кўлидан сув йиғиш ва айниқса уни сотиш учун ҳеч қандай рухсат бермаганини маълум қилди. Таълим муассасаси вакиллари реклама муаллифлари билан боғланиб, уларни имкон қадар тезроқ ўчириб ташлашга ваъда беришди.
“Ҳикматга тўла” сувни сотиб олган бўлармидингиз?
Изоҳ (0)