Швецияда уч фарзандининг оғиз бўшлиғи саломатлигига бефарқ бўлган ота-оналар қамоқ жазосига тортилди. Бу ҳақда Aftonbladet нашри хабар берди.
Нашр маълумотига кўра, воқеа болалар стоматологга мурожаат қилганидан сўнг фош бўлган. Бурос шаҳридаги стоматологлар болалар тишлари ҳолатидан хавотир билдириб, бу ҳақда тегишли идораларга хабар берган. Шифокор уч нафар болада жиддий кариес борлигини аниқлаган ва яллиғланган тишларни олиб ташлашга мажбур бўлган.
Болалардан бири учун ҳолат шу қадар оғир бўлганки, унинг саккизта тиши наркоз остида суғуриб ташланган. Қолган ака-уканинг ҳам келажакда соғлиқ билан боғлиқ муаммоларга дуч келиш хавфи мавжуд.
Операциядан сўнг стоматологлардан бири болалардан бирининг оғзига қараб юраги безовта бўлганини гувоҳлик сифатида баён қилган. Тергов давомида ота-оналар айбни тан олмади ва фарзандларига имкон қадар яхши қараганликларини таъкидлади. Бироқ суд уларнинг бу даъволарини рад этди.
Суд тиббий ҳужжатлар ва далиллар асосида ота-оналарни вояга етмаганларга нисбатан жиноий лоқайдликда айбдор деб топди. Улар 8 ой муддатга озодликдан маҳрум этилди.
Швеция қонунчилигига кўра, ота-оналар фарзандларининг нафақат таълими ва фаровонлиги, балки соғлиги, жумладан тиш парваришини ҳам таъминлашга мажбурдир. Бу мажбуриятни бажармаслик болаларга етказилган жиддий зарар сифатида баҳоланади ва жисмоний ёки психологик зўравонлик билан тенг даражада кўрилади.
Изоҳ (0)