“Юксалиш” ҳаракати ва “Ўзсувтаъминот” АЖ ичимлик суви ва оқова тизимлари объектларида олиб борилган қурилиш-монтаж ишлари мониторинги жараёнида аниқланган камчиликлар бўйича бир-бирини ёлғон маълумот тарқатишда айбламоқда.
Гап нима ҳақда?
2024 йил якунида аҳолини тоза ичимлик суви ва оқова сув билан таъминлаш бўйича белгиланган вазифаларнинг амалга оширилиши юзасидан “Юксалиш” ҳаракати томонидан жамоатчилик мониторинги ўтказилган.
Мониторингда республика бўйлаб 101 та маҳаллада амалга оширилиши белгиланган 99 та лойиҳа танлов йўли билан ўрганилади. Ичимлик суви ва оқова сув тизими билан таъминланиши бўйича аҳоли фикри ўрганилган.
Натижада расмий ҳисоботларда тўлиқ бажарилиб, фойдаланишга топширилган деб кўрсатилган 23 та лойиҳа доирасида қурилиш, реконструкция қилиш ва таъмирлаш ишлари якунига етказилмагани, 28 та лойиҳа бўйича объектлар белгиланган муддатда фойдаланишга топширилмагани, 15 та маҳаллада ишлар якунланган бўлишига қарамай, таъминот тўлиқ йўлга қўйилмагани, 9 та лойиҳа бўйича ишлар сифатсиз бажарилгани маълум бўлди, дейилади ҳаракат маълумотида.
“Ўзсувтаъминот”дан раддия
“Ўзсувтаъминот” АЖ эълон қилган раддияда айтилишича, “Юксалиш” ҳаракати маълумотларни “Ўзсувтаъминот”дан эмас, бошқа вазирлик ва идоралардан олишга уринган. Бундан ташқари, ушбу ўрганишлар давомида жамиятнинг мазкур йўналишдаги бирорта мансабдор вакили иштирок этмаган.
“Юксалиш” ҳаракати томонидан ҳудудлардаги қурилиш объектлари нопрофессионал ёндашув асосида ўрганилган. Яъни ҳар бир қурилиш объекти белгиланган тартибда лойиҳа-смета ҳужжатлари асосида ўрганилади аслида. Мазкур ҳужжат яъни ҳар бир кўрсатилган манзилнинг лойиҳа-сметаси буюртмачи, қурувчи ташкилот ва лойиҳачида бўлади. “Юксалиш” ҳаракати томонидан эса қандай меъёр ва параметрлар асосида ўрганилгани улар томонидан эълон қилинган материалда белгиланмаган, афсуски!
Объектларда давом этаётган ишлар ҳам негадир “Юксалиш” ҳаракати ўрганувчиларининг қурилиш ишлари якунланган, сув йўқ, деган асоссиз хулоса чиқаришига сабаб бўлган, негадир!!!, дейилади “Ўзсувтаъминот” раддиясида.
Қўшимча қилинишича, ўрганишлар ишчи гуруҳи таркибида соҳа фаолияти ҳақида тўлиқ маълумотга ва далилларга эга бўлмаган ходимларнинг шунчаки хулосалари асосида тайёрланганини кўрсатади.
Раддияга раддия
“Юксалиш” ҳаракати “Ўзсувтаъминот” раддиясига муносабат билдирди. Унда айтилишича, “Ўзсувтаъминот” раддиясида муаммо йўқ, деб кўрсатилган объектлардаги вазиятга аниқлик киритган ҳолда муаммолар ҳанузгача сақланиб қолмоқда.
“Юксалиш” ҳаракати ўрганишларни “Ўзсувтаъминот” тақдим этган маълумотлар асосида амалга оширган, бу борада нохолислик ва нопрофессионализмга оид айбловлар асоссиз. Аксинча, жамият бу борада ёлғон ахборот тарқатган.
Аҳолида ичимлик суви таъминоти билан боғлиқ эътирозлар кўплиги маълум бўлмоқда, дейилади ҳаракат раддиясида.
Баёнотда “Ўзсувтаъминот” Жамоатчилик назорати якунлари бўйича тайёрланган таклифларни кўриб чиқишда ҳиссиётга берилмасликни сўраган.
“Ҳиссиётли раддия”
Ҳаракати раҳбари Бобур Бекмуродов “Ўзсувтаъминот” баёнотини “ҳиссиётли раддия” деб атаган.
“Ўзсувтаъминот” жамоатчиликни чалғитгани ўз йўлига, асосийси барча рўйхатдаги объектлар назоратга олинди. Сув келмаган жойларга сув келди, келмаган жойларда эса тезда келиши ҳақида ваъдалар берилди. Биз шундан хурсандмиз.
Бугунги Ўзбекистон айнан шу билан ҳам кучли — бугун фуқаролик жамияти бор, бугун жамоатчилик назорати бор.
Биз бундан буён ҳам давлатимиз раҳбари томонидан белгиланган вазифалар ижросини назорат қилишда қатъий турамиз.
Вазирлик ва идоралар раҳбарларини эса пастга тушиб, ислоҳотлар ижросини актларга таяниб эмас, ўз қўли ва ўз кўзи билан назорат қилишга чақирамиз, деган Бобур Бекмуродов.
Ҳаракат раҳбари сўзининг охирида 16 июнь куни президент раислигида ўтган видеоселектор йиғилишда айнан мана шу масалаларга эътибор қаратилганига урғу берган.
Изоҳ (0)