Самарқанд вилоятида 1 кг гиёҳвандлик моддасини 10 минг долларга сотаётган икки нафар шахс қўлга олинди. Бу ҳақда вилоят ИИБ матбуот хизмати хабар берди.
Ургут туманида яшовчи шахс ўзининг танишларига 1 грамм гиёҳвандлик воситасини 130 минг сўмга сотиб келаётгани ҳақида маълумот олинган. 18 июнь куни Самарқанд шаҳар “Галаосиё” маҳалласида ўтказилган тезкор тадбирда Ургутда яшовчи 1985 йилдан туғилган шахс ўзининг таниши, Ургутда яшовчи 1990 йилда туғилган шахс билан бирга тадбирда шартли харидор сифатида қатнашган фуқарога 1 кг гиёҳвандлик моддасини 10 минг долларга сотаётганда ушланди.
Ҳолат юзасидан 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилиб, иккала фуқарога нисбатан қамоққа олиш эҳтиёт чораси қўлланилган.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)