Германия шарқидаги Айзенхюттенштадт шаҳри маъмурияти барча хоҳловчиларга икки ҳафталик бепул турар жой таклиф қилди. Бундай чора аҳоли сонининг ўсишига ёрдам бериши кутилмоқда. Бу ҳақда АҚШнинг CNN телеканали хабар берди.
Маҳаллий кенгаш баёнотига кўра, Берлиндан тахминан 96 км узоқликда, Польша билан чегарада жойлашган Айзенхюттенштадт шаҳри маъмурияти эҳтимолий янги резидентларга 14 кунлик “синов турар жойи”ни таклиф қилади. Хабарларга кўра, таклиф бу ерга доимий яшаш учун кўчиб келишни режалаштираётганларга қаратилган. Хусусан, гап “вазиятни ўзгартиришни хоҳлайдиган” малакали ишчилар ва ўзини ўзи банд қилганлар ҳақида кетмоқда.
Танлаб олинган иштирокчилар 6—20 сентябрь кунлари “Режаларни ҳозирдан тузинг” номли инновацион иммиграция лойиҳаси доирасида жиҳозланган квартирада бепул яшайди”, деди маҳаллий ҳокимият вакиллари. Икки ҳафта давомида одамлар шаҳар ҳаёти билан танишиб, инфратузилмасини ўрганиши режалаштирилган.
Қандай шаҳар?
Айзенхюттенштадт (номи “пўлат қуювчилар шаҳри” деб таржима қилинган) 1950 йилда собиқ Шарқий Германия социалистик ҳукумати даврида ташкил этилган. Илгари собиқ Совет раҳбари Иосиф Сталин шарафига Сталинштадт ёки Сталинград номи билан танилган, 1989 йилда Берлин девори қулаганидан кейин Шарқий ва Ғарбий Германия бирлашгандан сўнг қайта номланган.
Собиқ Шарқий Германиянинг кўплаб шаҳарларида бўлгани каби, мамлакат қайта бирлашганидан кейин бу ерда аҳоли сони 50 мингдан ортиқ кишидан ҳозирги 24 мингга яқин кишига камайди.
Бугунги кунда Айзенхюттенштадтда 2500 киши ишлайдиган Шарқий Германиядаги энг йирик интеграциялашган пўлат заводи, шунингдек, металлни қайта ишлаш маркази жойлашган. Социалистик даврдаги кўплаб бинолар тарихий ёдгорликлар рўйхатига киритилган.
Изоҳ (0)