Хитойда бир аёл аэропортдаги юзни аниқлаш тизими томонидан танилмагани сабабли макияжини ўчиришга мажбур қилинди. Бу ҳақда Oddity Central хабар берди.
Ўтган ҳафта Хитой ижтимоий тармоқларида тарқалган қисқа видеода аэропорт ходимлари аёлга юзидаги макияжни нам салфетка ёрдамида артишни талаб қилаётгани акс этган. Видеода кўрсатилишича, аёл шахсий гувоҳномасидаги фотосуратга ўхшаш кўринишга келгунча макияжини тозалаши кераклиги айтилган.
Видео ўтган йилнинг сентябрь ойида Шанхай аэропортида суратга олинган, аммо яқиндагина ижтимоий тармоқларда одамларнинг эътиборини тортган. Видеода камерани ушлаб турган шахс (эҳтимол аэропорт расмийси) аёл макияжини бутунлай артиб, шахсий гувоҳномасидаги суратга ўхшашини талаб қилмоқда.
Видеода аэропорт ходими йўловчи аёлга шундай бақирган.
Паспорт фотосуратидай кўринмагунча ҳаммасини артиб ташла, нега шундай макияж қиласан? Ўзингга муаммо сўраяпсан?, дейди у.
Аёл охир-оқибат аэропортнинг юзни аниқлаш текширувидан ўтган-ўтмагани аниқ эмас, аммо унинг бошидан кечирганлари ижтимоий тармоқларда кулгили шарҳларга сабаб бўлди.
Баъзилар ёш аёлга ачиниб, у аллақачон жуда уятчан кўринаётганини айтишди ва аэропорт расмийсининг макияж ҳақида доимий гапиришига ҳожат йўқлигини таъкидлашди. Бошқалар эса замонавий юзни аниқлаш сканерларига макияж қанчалик муаммо бўлиши мумкинлиги ҳақида савол қўйишди.
“Макияж қанчалик қалин бўлмасин, юзни таниб бўлмаслиги мумкин эмас-ку? Эҳтимол, ускуна янгиланиши керакдир”, деган фикрлар ҳам билдирилди.
Бундан анча аввал ҳам бир неча хитойлик аёллар Жанубий Кореяга юз жарроҳлиги учун учиб борганида юзлари жуда ўзгаргани сабабли мамлакатга киришда муаммога дуч келишган.
Изоҳ (0)