2025 йил 9 июнь куни Тошкентда ўтказилган Ўзбекистон-Словакия бизнес-форуми доирасида Ўзбекистон Республикасининг давлат экспорт-кредит агентлиги — “Ўзбекинвест” EISК АЖ ҳамда Словакия Экспорт-импорт банки (EXIMBANKА СР) ўртасида муҳим ҳамкорлик битими имзоланди. Бу қадам Ўзбекистон ва Словакия ўртасидаги тобора мустаҳкамланиб бораётган савдо-иқтисодий алоқаларнинг натижаси бўлиб, икки давлат миллий экспортини қўллаб-қувватлаш учун янги истиқболларни очди.
Мазкур битим экспорт-импорт операцияларини қўллаб-қувватлаш механизмларини ривожлантиришга, жумладан ўзбек ва словак экспортчиларига молиявий ва суғурта ёрдамини кўрсатишга қаратилган. Ҳужжат доирасида томонлар экспорт хатарларини суғурталаш, қайта суғурталаш, тажриба ва илғор амалиётларни алмашиш соҳаларида ўзаро ҳамкорлик қилиш, шунингдек халқаро савдони рағбатлантиришга хизмат қиладиган янги суғурта ва молиявий воситаларни биргаликда ишлаб чиқиш бўйича келишиб олдилар.
Ходимларни тайёрлаш ва малакасини оширишга, таҳлилий ва статистик маълумотлар алмашишга, шунингдек, ташқи бозорларда фаолият юритаётган инвесторлар манфаатларини ҳимоя қилишни таъминлаш бўйича қўшма ташаббусларни шакллантиришга алоҳида эътибор қаратилади.
Ушбу ҳужжатнинг имзоланиши нафақат Ўзбекистон ва Словакия ўртасидаги икки томонлама муносабатлар учун, балки Ўзбекистон иқтисодиётининг Европа ва жаҳон таъминот занжирларига янада кенгроқ қўшилиши учун ҳам муҳим стратегик аҳамиятга эга. Бу Европа мамлакатларининг Марказий Осиё минтақасидаги иштирокини кенгайтиришга бўлган қизиқишини ва Ўзбекистоннинг экспорт бозорларини диверсификация қилиш ва инвестицияларни жалб этишга қаратилган саъй-ҳаракатларини намоён этади.
“Ўзбекинвест” суғурта компанияси республикамиз экспортни қўллаб-қувватлаш ва ташқи иқтисодий фаолиятни ривожлантириш миллий тизимининг асосий элементи сифатида экспорт шартномаларини суғурта қилиш, инвестиция кафолатлари ҳамда муайян тармоқ ва йўналишларга мос индивидуал ечимларни ўз ичига олган кенг хизматлар доирасини таклиф этиб келмоқда.
Халқаро ҳамкорликни доимий равишда кенгайтириб борган ҳолда, “Ўзбекинвест” халқаро стандарт ва амалиётларни фаол жорий этмоқда, бу эса ўз навбатида, ўзбек бозорида ишлашдан манфаатдор бўлган экспортчилар, инвесторлар ва молиявий институтлар учун қулай шароитлар яратишга хизмат қилмоқда.
EXIMBANKА СР билан тузилган келишув “Ўзбекинвест”нинг халқаро даражада ишончли ва малакаси баланд ҳамкор сифатидаги нуфузи тобора ошиб бораётганини намоён этмоқда. Компания ўзбек корхоналарининг халқаро бозорларга чиқишига самарали кўмаклашиш қобилиятига эга эканини яна бир бор исботлади.
Реклама ҳуқуқи асосида.
Изоҳ (0)