Ҳиндистоннинг Ҳайдаробод шаҳрида жойлашган Harvesting Robotics номли технологик стартап ретривер зотли итни ишга олди. Ҳозирда олтин тусли кучукча “бахт директори” лавозимида фаолият юритмоқда. Бу ҳақда The Indian Express нашри хабар берди.
Тадқиқотларга кўра, иш жойида ҳайвонларнинг мавжудлиги ходимларнинг стресс даражасини камайтиришга ёрдам беради, ижтимоий муносабатларни яхшилайди ва ҳатто иш самарадорликни оширади. Нашр таъкидлаганидек, Amazon ва Google каби кўплаб компаниялар бу амалиётни узоқ вақтдан бери қўллаб келмоқда. Harvesting Robotics ҳам тўртоёқ ходимни ишга олиб, кўплаб ижтимоий тармоқлар фойдаланувчиларининг эътиборини қозонди.
“Янги ходимимиз — Денвер билан танишинг, у бахт директори. У бизга ўхшаб кодлаш билан шуғулланмайди, робот ишларига аҳамият бермайди. Кучук шунчаки ёнимизда бўлгани учун кайфиятимизни кўтаради ва ходимларни энергия билан тўлдиради”, деб ёзади LinkedIn’да стартап асосчиси Раҳул Арепака.
“Ҳа, биз расмий равишда ҳайвонларга дўстона муносабатдаги компанияга айландик ва фикримча, бу энг яхши қарор. Айтганча, Денвер компанияда бериладиган энг яхши бонусларга эга”, дея қўшиб ўтди Арепака.
Ушбу пост LinkedIn’да машҳур бўлиб кетди ва 16 мингдан ортиқ лайк йиғди.
“Бугун мен кўрган энг зўр контент бўлди”, деб фойдаланувчилардан бири изоҳ қолдирди. “Янги ғоялар, янги фикрлаш усули. Омад тилайман”, дея фикрини билдирди бошқалар.
Human Animal Bond Research Institute (Инсон ва ҳайвонлар ўртасидаги боғлиқликни ўрганиш институти) томонидан ўтказилган тадқиқот шуни кўрсатдики, ҳайвонлар учун қулай муҳитга эга ташкилотларда ишлайдиган ходимларнинг 87 фоизи компанияда қолишга тайёрроқ, 91 фоизи эса ишга янада кўпроқ қизиқиш уйғонганини ҳис қилади.
Изоҳ (0)