Ижтимоий тармоқларда кулгили, шу билан бирга, ноодатий видеолар кенг тарқалди. Нидерландиянинг Дренте провинциясидаги Эммен шаҳрида жойлашган Wildlands Аdventurе Zоо ҳайвонот боғида маймунлар бир аёлнинг телефонини ўғирлаб, ўзларини видеога олишди.
32 ёшли Шаҳра Бахлул телефонини ҳайвонот боғидаги макакалар сақланадиган жойга тасодифан тушириб юборган, аёлни ортидан кимдир туртиб юборган эди. Шаҳра бу ҳолат ҳақида ҳайвонот боғи ходимларига хабар берган, улар эса телефонни кейинроқ қайтариб беришни ваъда қилган.
Эртаси куни Бахлул ҳайвонот боғига қайтиб бориб, смартфонини олиб кетган. Қурилма лойга ботган эди. Аёл уни ёққан заҳоти булутли сақлаш тизимига бир нечта файл юклана бошлаган. Маълум бўлишича, макакалар телефонни олиб, видео ва селфиларга тушишган. Маймунлар томонидан олинган видеода уларнинг қизиқиб камерага қарагани ва телефонни бир жойдан иккинчи жойга олишгани акс этган.
Бахлул ушбу видеони ижтимоий тармоқдаги саҳифасида эълон қилди. Ҳайвонот боғи ходимларидан бири ҳам видеога изоҳ қолдириб, смартфоннинг синмагани омадли бўлганини қайд этди.
Изоҳ (0)