АҚШ ёрдамининг тўхтатилиши сабаб Жанубий Суданда болалар ўлди

АҚШ тиббий ёрдам дастурлари қисқартирилгани сабаб Жанубий Суданнинг шарқий Жонглей штатида камида саккиз киши, жумладан беш нафар бола ҳалок бўлди. Гап шундаки, улар маҳаллий клиникалар ёпилгани боис иссиқда уч соатлик йўл босиб, вафот этган. Бу ҳақда Al-Jazeera телеканали Save the Children хайрия ташкилотига таяниб хабар бермоқда. 

Қайд этилишича, уларнинг ўлими АҚШ собиқ президенти Дональд Трампнинг “Америка биринчи” сиёсати сабаб халқаро гуманитар дастурларига маблағ ажратиш қисқартирилганидан кейин юз берган.

“Кучли давлатлар томонидан яқин ҳафталар ичида қабул қилинган қарорлар болалар ўлимига олиб келди — бу ҳолат жаҳон ҳамжамиятини ларзага солиши керак,” деди Save the Childrenнънинг Жанубий Судандаги директори Кристофер Няманди.

Ўтган йилгача ташкилот мамлакатдаги 27 та соғлиқни сақлаш марказини қўллаб-қувватлаб келган. Бироқ АҚШ ёрдамининг қисқариши сабаб уларнинг еттитаси бутунлай ёпилган, қолган 20 таси эса фаолиятини чеклашга мажбур бўлган. Бунинг натижасида бутун мамлакат бўйлаб фаолият кўрсатаётган 600 дан ортиқ тиббиёт ходимининг 200 нафари ишсиз қолган.

Бундан ташқари, АҚШ маблағлари ҳисобига беморларни шифохонага олиб борувчи транспорт хизмати ҳам издан чиққан. Натижада вабо юқтирган беморлар тиббий ёрдам олиш учун 40 даража иссиқда соатлаб пиёда юришга мажбур бўлган.

АҚШ Давлат департаменти воқеа юзасидан маълумотга эга эмаслигини билдирган бўлса-да, расмийлар Жанубий Судан раҳбариятини хорижий ёрдамни ноқонуний ишлатишда айблади.

“Фавқулодда вазиятлар учун ёрдам дастурлари давом этмоқда, аммо биз америкалик солиқ тўловчилардан коррупционэр сиёсатчиларни молиялаштиришга рухсат сўрашни виждонан тўғри деб ҳисобламаймиз,” дея таъкидлаган АҚШ Давлат департаменти вакили Reuters’га.

Жанубий Судан ҳукумати мамлакатда кенг кўламли коррупция борлигини тан олган, бироқ президент Салва Кир оиласига оид айбловларни рад этган. Шу сабабли гуманитар ёрдамлар асосан нодавлат ташкилотлар орқали етказиб берилади.

Save the Childrenн ташкилотининг мамлакат учун жорий йиллик бюджети 50 миллион доллардан 30 миллион долларга қисқариши кутилмоқда. Бу эса гуманитар вазиятни янада оғирлаштиради.

БМТ ҳисобига кўра, мамлакатда яшовчи 12 миллион аҳолининг учдан бир қисми можаролар ёки табиий офатлар сабаб ўз уйларини тарк этган. UNICEF маълумотига кўра, ўтган йилнинг октябрь ойида эълон қилинган вабо эпидемияси билан ҳозиргача 40 минг киши касалланган. Беморларнинг 700 нафари вафот этган. Уларнинг ярми 15 ёшгача бўлган болалардир.