Калифорния штати ва губернатор Гевин Ньюсом АҚШ президенти Дональд Трамп, Пентагон ва мудофаа вазири Пит Хегсетга қарши Лос-Анжелесда Миллий гвардия қўшинлари жойлаштирилгани сабабли судга шикоят аризасини топширди. Бу ҳақда штат раҳбари Х ижтимоий тармоғида ёзди.
Сан-Франциско федерал округ судига топширилган 22 саҳифали шикоятда Трамп федерал қонунчилик ва конституцияни бузгани таъкидланади. Штат суддан миллий гвардиячиларни жойлаштиришни бекор қилишни ва улар устидан назоратни губернаторга қайтаришни талаб қилган.
“Трамп қонуний ижро ҳокимияти чегараларидан чиқиш учун бир неча бор фавқулодда ваколатлардан фойдаланган. 7 июнь, шанба куни у маҳаллий ҳокимият назоратидаги норозилик намойишидан фойдаланиб, яна бир бор мисли кўрилмаган тарзда ҳокимиятни қўлга киритди. Бу сафар Калифорния штати суверенитети ҳисобига ва губернаторнинг штат миллий гвардияси бош қўмондони сифатидаги обрўси ҳамда ваколатларига зид равишда”, дейилади ҳужжатда.
Даъво аризасида таъкидланишича, миллий гвардия кучларидан фойдаланиш штат аҳолиси орасида ваҳима ва тарангликни кучайтирган, полиция эса зўравонликни тўхтатишда самарали фаолият олиб борган.
Калифорния бош прокурори Роб Бонтанинг журналистларга маълум қилишича, Трамп ўзидан олдин фақат бир марта, 1970 йилда президент Ричард Никсон почта иш ташлаши пайтида юк етказиб бериш учун ҳарбийлардан фойдаланганда қўлланилган қонунни ишга туширган. Бундан ташқари, бу 1965 йилдан бери губернаторнинг розилигисиз қонунни амалга оширишнинг биринчи ҳолати бўлди. Ўшанда президент Линдон Жонсон Алабамада фуқаролик ҳуқуқлари учун намойишчиларни ҳимоя қилиш мақсадида қўшинларни жойлаштирганди. Ўша пайтда губернаторлар давлат мактабларини ирқий ажратишни бекор қилиш тўғрисидаги суд қарорларига қаршилик кўрсатишганди.
АҚШ президенти миллий гвардияни “яхши бажарилган иш” учун мақтади. Трамп ўз қарорини тўғри деб баҳолаб, журналистларга ҳарбийлар киритилмаганда шаҳар “ёниб кул бўлиши”ни айтди. У Калифорния ва Лос-Анжелес раҳбариятини норозилик намойишлари пайтида зўравонликка қарши етарли чоралар кўрмаганликда айблади ва губернаторни ҳибсга олиш мумкинлигини таъкидлади.
АҚШ ҳукумати Калифорнияга 2 минг миллий гвардиячи ва 700 денгиз пиёдасини оммавий тартибсизликлар бошланганидан сўнг юборди. Бунга АҚШ иммиграция ва божхона полициясининг (ICE) ноқонуний муҳожирларга қарши рейдлари сабаб бўлди: натижада ўнлаб одамлар ҳибсга олинди.
Намойишлар Лос-Анжелес ва Сан-Франциско шаҳарларини қамраб олди. Намойишчиларни тарқатиш учун кўздан ёш оқизувчи газ ва шовқинли гранаталар ишлатилди. Губернатор Оқ уйнинг қарорини ноқонуний деб баҳолаб, миллий гвардиячиларни зудлик билан чақириб олишни талаб қилди.
Изоҳ (0)