Озарбайжонда “Россия сегодня” медиагуруҳига кирувчи Sputnik ахборот агентлигининг ваколатхонаси тугатилди. Бу ҳақда Ташқи ишлар вазирлиги матбуот котиби Ойхон Ҳожизода хабар берди.
Ҳожизоданинг таъкидлашича, Россия компанияси Озарбайжонда фақат битта мухбир учун аккредитация олиши мумкин. “Россия сегодня” медиагуруҳи ваколатхона тугатилгани ҳақида расмий билдиришнома олмаганини билдирди.
Шунингдек, Озарбайжонда BBC фаолияти ҳам тўхтатилди. Корпорация томонидан эълон қилинган баёнотга кўра, Озарбайжон томони бу қарор ҳақида уни оғзаки хабардор қилган. Журналистлар “вазиятга ойдинлик киритилгунга қадар” ўз фаолиятини тўхтатган.
BBC озарбайжон тилида репортажлар олиб боришни давом эттириш ниятидалигини билдирган. Озарбайжон Ташқи ишлар вазирлиги фақат битта мухбирга аккредитация беришни режалаштираётганини таъкидлаган.
Бундан ташқари, Озарбайжон “Америка овози” радиоси мухбирининг аккредитациясини бекор қилган. Бу қарорнинг сабабларига аниқлик киритилмаган.
Февраль ойи бошида озарбайжонлик расмийлар Бокудаги Рус уйи фаолияти тўхтатилгани ҳақида хабар берганди. Фаолиятни тугатиш тўғрисидаги қарор АҚШ Халқаро тараққиёт агентлиги (USAID)га нисбатан ҳам қабул қилинган. BakuTV телеканали Бокудаги Рус уйи ниқоби остида Россия махсус хизматлари ишлаётганини таъкидлаган. Шундан сўнг Озарбайжон элчиси Раҳмон Мустафоев Россия Ташқи ишлар вазирлигига чақирилган ва унга норозилик билдирилганди.
Изоҳ (0)