Америкалик миллиардер Илон Маск “Озодлик радиоси” ва “Америка овози”ни ёпишга чақирганди. Қирғизистон президенти Садир Жапаров буни қўллаб-қувватлади. Бу ҳақда “24.кг” хабар берди.
Жапаров турли АҚШ фондлари “Озодлик” ва бошқа оммавий ахборот воситаларини молиялаштириш учун қанча маблағ ажратаётгани ҳақида гапирганини эслатди.
“Агар пулни қаерга сарфлашни билмасангиз, тўғридан тўғри бизга, давлатга топширинг. Биз демократия ва инсон ҳуқуқларини энг юқори даражада таъминлаймиз”, деганди ўшанда Садир Жапаров АҚШ Давлат департаменти раҳбариятига мурожаат қилиб.
Қирғизистон раҳбари АҚШ президенти Дональд Трамп USAID фаолиятини уч ойга тўхтатганини, ҳозир эса Маск ва бошқа америкалик сиёсатчилар “Озодлик радиоси”ни ёпишни талаб қилаётганини тасодиф деб ҳисобламоқда.
Дональд Трамп ва Илон Маск менинг ташаббусларимга муҳтож эмас. Иккаласи ҳам миллиардер. Улар пул осмондан тушмаслигини жуда яхши билади. Улар америкаликларнинг пулларини беҳуда сарфлашни тўхтатмоқчи ва мутлақо тўғри қилишади. Ҳозир XXI аср. Ҳар қандай маълумот беш дақиқада бутун дунёга тарқалади. 20-30 йил олдин “Озодлик”ни ҳамма кутган, эшитган, ишонган. Чунки у пайтда интернет йўқ эди, смартфонлар йўқ эди. Ҳозир одамлар “Озодлик” янгиликларига муҳтож эмас. Ҳамма маълумотни интернет орқали олади, деди Жапаров.
Садир Жапаровнинг фикрича, халқ янгиликларни таҳлил қилишни ўрганган, ҳамма нарсага ҳам ишонмайди. Одамлар қайси хабарлар ишончсиз эканини тушунади.
Масалан, “Озодлик” кимнингдир обрўсига путур етказувчи нотўғри маълумот тарқаца, халқ таҳлил қила бошлайди. Бу нотўғри экани аниқланганида, “Нега сиз нотўғри маълумот тарқатяпсиз?”, деб одамлар сўрайди. Улар эса ўша хабарни сайтидан ўчириб ташлаб, “Кечирасиз”, дейди. Агар уларни судга берсангиз, бутун дунёга жар сола бошлайди: “Бизда сўз эркинлиги ўлди!” Бу нормал ҳолатми? Ҳақиқатга тўғри келмайдиган маълумотларни тарқатиш ёки янгиликларни манипуляция қилиш сўз эркинлигими? Ҳар нарсага рухсат беришни сўз эркинлиги ёки инсон ҳуқуқлари билан адаштирмаслик керак, деди Садир Жапаров.
Қирғизистон президенти шу сабабли Трамп ва Маскнинг қарорлари қўллаб-қувватлашга лойиқ эканини таъкидлади.
Трамп ва Маскнинг молиялаштиришни тўхтатиш қарори
Миллиардер Илон Маск Ҳукумат самарадорлиги департаменти (DOGE) раҳбари ҳисобланади. Ушбу тузилма ортиқча меъёрий ҳужжатларни йўқ қилиш, амалдорлар ва харажатларни қисқартиришга эътибор қаратади. Шундан келиб чиқиб, миллиардер “Озодлик радиоси” ва “Америка овози” солиқчилар пулини сарф қилаётганини айтган.
“Ҳа, уларни ёпинг. Европа энди озод (бўғувчи бюрократияни ҳисобга олмаганда). Уларни энди ҳеч ким тинглаётгани йўқ. Бу шунчаки ўзи билан гаплашаётган ақлдан озган радикал сўлчилар бўлиб, улар америкаликларнинг солиқларидан йилига 1 миллиард долларни сарф қилмоқда”, деб ёзган миллиардер Х саҳифасида.
У аввалроқ АҚШ ҳукумати Politico, The New York Times (NYT) газеталари ва Associated Press (AP) агентликларини молиялаштиришни тўхтатишини айтганди. Бунга AP Давлат департаментидан 620 минг доллар, NYT Соғлиқни сақлаш вазирлиги ва ижтимоий хизматлардан “ўнлаб миллион доллар” олгани сабаб қилиб кўрсатилган.
“Politico газетаси демократлар ҳақидаги ижобий мақолалари учун USAIDдан 8 миллион доллар олган, деган АҚШ президенти.
Оқ уй молиялаштириш USAID орқали амалга оширилганини маълум қилган. Politico бунга жавобан “ҳеч қачон давлат дастурлари ёки субсидияларининг бенефициари бўлмаганини” таъкидлаган. Трампнинг қўшимча қилишича, “бу тарихдаги энг катта жанжал бўлиши мумкин” ва демократлар “бундан қочиб қутула олмайди”.
Изоҳ (0)