Ўзбекистон газ ва олтин экспортини кескин оширди

Тўрт ой ичида олтин сотуви мамлакат умумий экспортининг қарийб ярмини ташкил этди. Газ экспорти ҳажми ҳам 85 фоиз ўсди.

Статистика қўмитаси 2025 йил январь—апрель ойларидаги Ўзбекистон ташқи савдоси ҳажмини очиқлади. Қайд этилишича, бу даврда мамлакат 11,9 млрд долларлик экспорт (йиллик ўсиш 35,1 фоиз), 12,7 млрд долларлик (ўсиш 2,9 фоиз) импорт операцияларини амалга оширган. Умумий ташқи савдо тақчиллиги 846,3 млн доллар бўлган.

Энг йирик савдо ҳамкорлар

Ўзбекистон ташқи савдо айланмасининг тўртдан уч қисми учта давлат ҳиссасига тўғри келмоқда. Хусусан, ҳисобот даврида республика билан Хитой 4,2 млрд долларлик, Россия 3,7 млрд долларлик, Қозоғистон 1,4 млрд долларлик савдо қилган.

Мамлакат экспорт–импорти таркибида энг юқори улуш Тошкент шаҳри — 8 млрд доллар ( жами савдонинг 32,7 фоизи), кам улуш эса Қорақалпоғистон (208,8 млн доллар ёки 0,8 фоиз) ҳиссасига тўғри келган.

Нималар кўп экспорт қилинди?

Январь–апрель ойларида экспорт улуши ортишида олдинги йиллар мос даврларига нисбатан кўп олтин сотилгани муҳим рол ўйнаган. Жумладан, жорий йил тўрт ойидаги экспорт тушумининг қарийб 5,5 млрд доллари ёки 46,1 фоизи олтин сотувидан келган. Бунда қимматбаҳо металл экспорти 2024 йил мос давридагидан (3,4 млрд доллар) 62,3 фоизга ўсган.

Январь—апрелда мамлакат олтинсиз экспорти ҳажми 6,4 млрд долларга етган (ўтган йилнинг шу даврида 5,1 млрд доллар бўлган).

Тўрт ой мобайнида 2,5 млрд долларлик хизматлар экспорт қилинган (жами ҳажмининг 21,1 фоизи). Бу кўрсаткич 2024 йил мос даврига нисбатан 36,4 фоизга кўп. Хизматлар экспорти таркибининг асосий улуши туризм (1,2 млрд доллар) ва транспорт (924,6 млн доллар) соҳалари ҳиссасига тўғри келган.

Ҳисобот даврида 1,2 млрд долларлик тушумлар саноат товарлари (умумий ҳажмнинг 10,1 фоизи) экспортидан бўлган.

Тўрт ой давомида мамлакат бошқа давлатларга 199,7 млн долларлик газ (ўсиш 85 фоиз), 71,7 млн долларлик электр токи сотган.

Ўз навбатида 429,3 млн долларлик сабзавот ва мевалар (ўсиш 41,9 фоиз), 170,6 млн долларлик донли экинлар ҳамда улардан тайёрланган маҳсулотлар (ўсиш 33,6 фоиз) экспорт қилинган. Хорижга сут (25 млн доллар, ўсиш 146,8 фоиз) ҳамда гўшт ва гўшт маҳсулотлари (5,8 млн доллар, ўсиш 31,2 фоиз) экспорти ҳам ошган,

Импорт таркиби

Импорт таркибида энг катта улушни машиналар ва транспорт асбоб-ускуналари (33,9 фоиз), саноат товарлари (16,3 фоиз), кимёвий воситалар ва шунга ўхшаш маҳсулотлар (13 фоиз) ташкил этган.

Энг кўп товар ва хизматлар Хитой (3,6 млрд доллар), Россия (2,5 млрд доллар) ва Қозоғистон (986,8 млн доллар) давлатларидан сотиб олинган.

Республика ҳудулар миқёсида импортнинг асосий улушини Тошкент шаҳри (48,6 фоиз) қамраган бўлса, энг кам кўрсаткич Қорақалпоғистонда (0,7 фоиз) қайд этилган.

Тўртинчи ойдирки, Ўзбекистонга автомобиллардан (213,7 млн доллар) кўра, уларнинг эҳтиёт қисмлари (“запчастлар”) кўпроқ импорт қилинмоқда. Жумладан, январь–апрель ойларида чет элдан 544,4 млн долларлик автомобиллар эҳтиёт қисмлари сотиб олинган. Бунда автомобиль импорти уч карра қисқарган бўлса, “запчаст” импорти 34,4 фоизга ошган.

Ҳисобот даврида мамлакат 150,5 млн долларлик табиий газ импорт қилган. Бу ўтган йил мос давридагидан 64,2 фоизга кам.