Ўзбекистонда чорвачиликнинг сутчилик тармоғи жадал ривожлантирилади. 14 май куни “Қишлоқ хўжалигини ривожлантириш халқаро жамғармаси иштирокидаги ‘Ўзбекистоннинг сутчилик соҳасида қўшилган қиймат занжирини ривожлантириш (2-босқич)ʼ лойиҳасини амалга ошириш чора-тадбирлари тўғрисида”ги президент қарори қабул қилинди.
Қарорга кўра, лойиҳанинг асосий мақсадли кўрсаткичлари этиб қуйидагилар белгиланди, жумладан:
- Жиззах, Қашқадарё, Сирдарё, Самарқанд ва Сурхондарё вилоятларида жами 320 та маҳаллага, сут етиштирувчи 12 мингта аҳоли ва деҳқон хўжалигига хизмат кўрсатувчи 100 та сут йиғиш пунктини ташкил этиш;
- 865 нафар аҳоли ва деҳқон хўжалигига сутни қайта ишловчи корхоналарни ташкил этиш ва модернизация қилишга 250 минг АҚШ долларигача имтиёзли кредитлар ажратишни ташкил этиш;
- сут етиштирувчи ва сотиб олувчиларни бирлаштирадиган Миллий сут маҳсулотлари платформаси дастурий таъминотини ишга тушириш;
- қорамолларнинг маҳсулотдорлигини ошириш бўйича сут етиштирувчи 1,2 минг нафар аҳоли ва деҳқон хўжалиги вакилларининг хорижий мутахассислар томонидан ўқитиш.
Лойиҳанинг умумий қиймати 53,01 миллион доллар бўлиб, уни молиялаш учун Қишлоқ хўжалигини ривожлантириш халқаро жамғармаси томонидан 25 йилга 30 миллион доллар миқдорида имтиёзли кредит ҳамда 7,8 миллион доллар миқдорида кредит ажратилади. Лойиҳа қийматидан 5,94 доллар эквивалентидаги маблағлар лойиҳа иштирокчилари улуши, 9,27 миллион доллар эквивалентидаги маблағлар, шу жумладан, солиқ, божхона ва офис ижара харажатлари тўлови кўринишидаги 3,69 миллион доллар, инвестиция даврида молиявий харажатлар кўринишидаги 5,558 миллион доллар эквивалентдаги маблағлар Ўзбекистон улуши ҳисобланади.
Лойиҳани амалга ошириш даври 7 йил (2025–2031 йиллар) этиб белгиланди.
Ўзбекистонда сут етиштириш
Мамлакатда сут етиштириш ҳажми йилдан йилга ошиб бормоқда. 2024 йилнинг июль ойига келиб мамлакатда 5,4 миллион тоннадан ортиқ сут ишлаб чиқарилган бўлиб, бу ўтган йилнинг шу даврига нисбатан 2,6 фоизга кўпдир. Мамлакатда тахминан 4,7 миллионта сут чорваси мавжуд бўлиб, йиллик умумий сут ишлаб чиқариш ҳажми 10,2 миллион тоннани ташкил этади.
Сут ишлаб чиқаришнинг катта қисми деҳқон хўжаликлари ҳиссасига тўғри келади. Мамлакатдаги сут чорваларининг 94 фоизи деҳқонларга тегишли бўлиб, улар умумий сут ишлаб чиқаришнинг 90 фоизини таъминлайди.
2025 йилнинг март ойида “Қишлоқ хўжалигида ердан фойдаланиш самарадорлигини ошириш ва маҳсулот етиштириш ҳажмини кўпайтириш бўйича қўшимча чора-тадбирлар тўғрисида”ги президент қарори билан чорвачилик учун озуқа экинлар етиштириш ҳажмини ошириш орқали гўшт ва сут маҳсулотлари нархларининг барқарорлигини таъминлаш белгиланганди.
Изоҳ (0)