Ака-ука Вачовскиларнинг “Матрица” фантастик жангари фильми дунёни “олдин” ва “кейин”га ажратиб юборди. Фильмни суратга олиш учун махсус яратилган бетакрор визуал эффектлар бошқа режиссёрларнинг асарларига ҳам кўчди ва жангари фильмлар яратиш услубини бутунлай ўзгартириб юборди.
Фильм кўплаб нуфузли мукофотларни қўлга киритди, улар орасида тўртта “Оскар” мукофоти ҳам бор. Эътиборли жиҳати шундаки, барча олтин ҳайкалчалар “Матрица”га фильмнинг техник жиҳатлари учун берилди: “Энг яхши монтаж”, “Энг яхши овоз”, “Энг яхши визуал эффектлар” ва “Энг яхши овоз монтажи”. Бироқ Америка киноакадемиясининг бундай юксак баҳосига қарамай, фильмда анчагина хато ва камчиликлар ҳам бор.
Ўзи қовуриладиган стейк
Одатда суратга олиш жараёнида актёрлар овқатни ейишади, баъзан бир неча дублларда ҳам. Шу боис ҳатто битта саҳнани суратга олиш пайтида ҳам бир нечта таом ишлатилиши мумкин.
Бу хоин Сайфер (Жо Пантоляно) билан агент Смит (Ҳьюго Уивинг) ўртасидаги суҳбат саҳнасида яққол кўзга ташланади. Улар ресторанда тушлик қилиб, қўзғолончилар гуруҳини топшириш шартларини муҳокама қилишмоқда. Суҳбат давомида Сайфер чала пишган стейкдан катта бўлак кесиб олади. Бироқ кадр ўзгарганида унинг санчқисида яхши қовурилган гўшт бўлаги пайдо бўлади.
Печенье ейсанми?
Эски ошхонада Нео (Киану Ривз) башоратчи аёлга дуч келади ва ўзининг ҳали танланган бўлишга тайёр эмаслигини билиб олади. Бу хабар Neonи бир оз саросимага солади — у хафа бўлмаслиги учун Пифия меҳмонни пишириқлар билан сийлайди.
Диққат билан кузатилса, у столга олиб келаётган ликопчага тўртта печенье қўйганини кўриш мумкин. Кейин Неога вазиятни тушунтиради ва унга ширинликни узатади. Аммо энди ликопчадаги печеньелар 6 та бўлиб қолади.
Кейинги саҳнада Нео аёлнинг уйидан тишланган пишириқ билан чиқади. Аммо Морфеуснинг қисқа гапидан сўнг Неонинг қўлида яна бутун пишириқ пайдо бўлади.
Шунчаки тирналиш
Фильмнинг энг машҳур саҳнаси, шубҳасиз, бино томидаги эпизоддир. Унда Нео биринчи бор ўқлардан қочиш маҳоратини намойиш этади. Бу лаҳза “Матрица” учун махсус яратилган “буллет тиме” технологияси ёрдамида суратга олинган.
Бош қаҳрамон орқага эгилади. Унга отилган ўқларнинг деярли барчаси ёнидан ўтиб кетади, фақат охирги иккитаси елкаси ва сонини тирнаб ўтади. Бу пайтда Неонинг танаси горизонтал ҳолатга яқинроқ туради, шунинг учун тирналишлар қўл ва оёқ бўйлаб кетади. Бироқ фильмнинг қолган қисмида Киану Ривз ўнг елкасида горизонтал ўқ изи билан югуриб юради. Тўғри, метрода агент Смит билан бўлган жанг пайтида бу из бир лаҳзага йўқолади. Аммо кейин яна пайдо бўлади.
Воқеа жойи
Фильм воқеалари Америка мегаполисида кечади. Бироқ “Матрица” Сиднейда суратга олинган. Жамоа суратга олишларни шундай ташкил этганки, экранда шаҳарга алоқадор бўлган бирорта бино кўринмайди. Аммо айрим кадрлардан воқеалар Австралияда рўй бераётганини билиб олиш мумкин.
Гап шундаки, австралияликлар ҳам, британияликлар сингари йўлнинг чап томонидан юришади, АҚШда эса ҳаракат ўнг томонлама. Бу фарқ жаноб Андерсон деразадан чиқиб, телефонини тушириб юборган саҳнада яққол кўзга ташланади. Ўша пайтда кўчадаги машиналар Австралия услубида ҳаракатланмоқда. Худди шундай манзарани кўприк остидаги саҳнада, Нео Тринитининг машинасига ўтирганида, орқа планда кузатиш мумкин.
Воқеалар АҚШда кечмагани кўрсатувчи яна бир белги — агентлар Морфеусни ушлаб турган бинодаги лифт эшиги ёнидаги ёзувдир. Унда ёнғин пайтида лифтдан фойдаланмаслик кераклиги ёзилган. Чунки америкаликлар лифтни “элеватор” деб атайди.
Кўзгудаги акс
Фильм давомида бош қаҳрамонлар ва уларни таъқиб қилаётган агентлар доимо қора кўзойнак тақиб юришади. Бу аксессуар жуда замонавий кўринади ва воқеалар қайси реалликда содир бўлаётганини кўз билан илғаш имконини беради.
Аммо эстетик афзалликлар оптик камчиликлар билан ёнма-ён келади — персонажларнинг қора кўзойнакларида суратга олиш гуруҳи аъзолари, ёритгичлар ва бошқа жиҳозларнинг акси тушган ўнлаб ҳолатларни кўриш мумкин.
Шунингдек, жаноб Андерсонни сўроқ қилиш саҳнасида унинг оғзи тўсатдан битиб қолганида, агент Смитнинг кўзойнакларидаги акс тескари эканлигини пайқаш мумкин. Юзини чангаллаб олган Киану Ривз хонанинг бурчагига тиқилиб олади, бироқ кейинги кадрда Ҳьюго Уивинг тақиб олган кўзойнакда у ҳамон стол ортида ўтирганини кўриш мумкин.
Изоҳ (0)