Сирдарё вилоятида Lacetti ҳайдовчиси 361 килограмм эшак гўштини олиб кетаётганда тўхтатиб қолинди. Бу ҳақда “Миллар” дастурида хабар берилди.
Аниқланишича, 25 май куни Қарши—Тошкент йўналишида ҳаракатланаётган Lacetti тўхтатилиб, холислар иштирокида кўздан кечирилганида машинанинг юкхонасидан ноқонуний гўшт маҳсулотлари топилган.
Текширувлар давомида ҳайдовчи гўшт ўзига тегишли эмаслигини, айтилган манзилга олиб кетаётганини айтган. Вилоят ИИБ Жамоат хавфсизлиги бошқармаси карантин чора-тадбирлари гуруҳи ходимига кўра, номаълум жониворга тегишли 361 килограмм гўшт аниқланган.
Маҳсулотлар Сирдарё вилояти ветеринария ва чорвачиликни ривожлантириш бош бошқармаси лабораториясига ўтказилганда эшак гўшти экани маълум бўлган.
Ҳозирда мазкур ҳолат юзасидан Сирдарё тумани Тергов бўлими томонидан суриштирув ишлари олиб борилмоқда.
Оққўрғон туманида эшак суякларининг сувга ташлаб кетилаётгани ҳолатидан бошланган тадбир Оҳангарон туманида давом эттирилиб, 3 нафар шахс гумонланувчи сифатида ушлангани ва терговга қадар суриштирув олиб борилаётгани ҳақида хабар берилган.
Ижтимоий тармоқларда Сурхондарё вилоятида фуқароларнинг эшак сўйгани айтилган ва ҳайвонлар жасади кўринган видео тарқалганди. Вилоят ҳокимлиги ахборот хизмати раҳбари бу эски видео эканлигини билдирган.
Маълумот учун, эшак териси ва ичаги тиббиётда субтовар сифатида фойдаланилади. Қонунчиликда эшак гўштини истеъмол қилиш ёки сотганлик учун жавобгарлик йўқ. Фақат эшак гўштини бошқа ҳайвон, масалан, мол гўшти деб сотганлик учун жавобгарлик мавжуд.+
Изоҳ (0)