Оммавий ахборот воситаларида Ўзбекистонда гўшт нархи МДҲ давлатлари билан солиштирганда қиммат деган мазмунда эълон қилинаётган материаллар сабабли 2025 йилнинг февраль ойи ҳолатига Ўзбекистон, Қозоғистон, Қирғизистон, Тожикистон ва Россияда гўшт маҳсулотлари (мол гўшти, қўй гўшти, товуқ гўшти)нинг ўртача нархлари таҳлил қилинди.
Нархларга оид ахборот тегишли мамлакатлар миллий статистика идораларининг веб-сайтлари эълон қилинган ойлик ва ҳафталик маълумотлар асосида тайёрланди. Бунда мамлакатлар, уларнинг пойтахтлар ва йирик шаҳарлари кесимида ўртача нархлар кўриб чиқилди. Нархлар миллий валюталарнинг АҚШ долларига нисбатан ўртача курси бўйича ҳисобланган.
Мол гўшти
2025 йилнинг февраль ойида мамлакат кесимида ўртача ҳисобда мол гўштининг энг юқори нархи Қирғизистонда кузатилди – 7,4 $/кг. Ўзбекистонда мол гўшти нархи 7,1 $/кг, Россияда – 6,6 $/кг, Қозоғистонда – 5,7 $/кг ни ташкил этди.
Озиқ-овқат маҳсулотлари нархларини таҳлил қилишда нафақат жорий нархлар, балки уларнинг ўсиш суръатлари ҳам ҳисобга олиш зарур. Бу борадаги динамика маҳсулотлар нақадар тез қимматлашаётгани (ёки арзонлашаётгани) ва ҳақиқатан ҳам нархларнинг кескин ўсиши бор-йўқлигини кўрсатади.
Масалан, жорий йилнинг дастлабки икки ойида Қозоғистонда мол гўштининг нархи 6,2 фоизга ошди. Қирғизистонда ўсиш 4 фоизни ташкил қилди, Ўзбекистонда – 3,7 фоиз, Россияда – 3,4 фоиз.
Бунда, Марказий Осиё мамлакатларида нарх динамикасининг тезлашиши фақат февраль ойида кузатилмоқда. Жумладан, Қозоғистонда 4,2 фоизга, Қирғизистонда 3,5 фоизга, Ўзбекистонда 3,1 фоизга тезлашди.
Кўриб чиқилаётган мамлакатларнинг пойтахтлари ва йирик шаҳарларида мол гўштининг энг юқори нархи Москвада – 8,3 $/кг, Бишкекда – 7,7 $/кг, Душанбеда – 7,3 $/кг, Санкт-Петербургда – 7,2 $/кг, Тошкентда – 6,8 $/кг қайд этилган.
Қўй гўшти
Кўриб чиқилаётган мамлакатлар орасида энг қиммат қўй гўшти Россияда – 8,8 $/кг, Ўзбекистонда – 7,4 $/кг, Қирғизистонда – 7 $/кг, Қозоғистонда – 5,8 $/кг.
Қирғизистонда йил бошидан бери қўй гўштининг ўртача нархи 4,1 фоизга, Ўзбекистонда 3,4 фоизга, Қозоғистонда 2 фоизга ва Россияда 0,4 фоизга ошди.
Нархларнинг ойлик ўсиш динамикаси Қирғизистон ва Ўзбекистонда энг юқори бўлди – февраль ойида ўсиш 3 фоизни ташкил этди. Қозоғистонда қўй гўштининг ўртача нархи 2,1 фоизга, Россияда 0,9 фоизга ошди.
Пойтахтлар ва йирик шаҳарлар кесимида энг қиммат қўй гўшти Москвада – 11,7 $/кг, Санкт-Петербургда – 10,5 $/кг, Тошкентда – 8,1 $/кг, Душанбеда – 7,5 $/кг, Бишкекда – 6,7 $/кг. Кўриб чиқилаётган мамлакатлар орасида қўй гўштининг энг паст нархлари Қозоғистонда: Олмаотада – 6,5 $/кг, Остонада – 6,3 $/кг.
Товуқ гўшти
Қирғизистонда товуқ гўштининг февраль ойидаги ўртача нархи 4,2 $/кг ни ташкил этди. Шу билан бирга, Қозоғистонда 3 $/кг, Ўзбекистон ва Россияда эса 2,4 $/кг бўлди.
Россияда йил бошидан бери товуқ гўштининг ўртача нархида кескин ўсиш кузатилмоқда – 9,7 фоиз. Шу билан бирга, Қозоғистонда нархлар 4,7 фоизга ошган, Қирғизистонда амалда ўзгаришсиз қолган, Ўзбекистонда эса товуқ гўшти ҳатто 0,5 фоизга арзонлашган.
2025 йил февраль ойида нархлар ўзгаришининг энг юқори ойлик динамикаси Россияда кузатилди – 7,4 фоиз. Қозоғистонда бу рақам 4,4 фоизни ташкил қилди, Ўзбекистонда – 0,3 фоизни. Шу билан бирга, Қирғизистонда товуқ гўшти февраль ойида 0,8 фоизга арзонлашди.
Пойтахтлар ва йирик шаҳарлар кесимида энг қиммат товуқ гўшти Бишкекда қайд этилган – 4,1 $/кг. Қозоғистон шаҳарларида товуқ гўшти арзонроқ: Остонада 3,4 $/кг, Олмаотада – 3,2 $/кг. Тошкентга бир килограмм товуқ гўшти 3,1 долларга тўғри келади. Кўриб чиқилаётган шаҳарлар орасида энг арзон товуқ гўшти Москва ва Санкт-Петербургда қайд этилган – 2,6 $/кг.
Озиқ-овқат маҳсулотлари нархининг глобал ўсиши
Таъкидлаш жоизки, глобал миқёсда озиқ-овқат нархларининг ошиши маҳаллий бозорларга ҳам таъсир кўрсатмоқда. БМТнинг Озиқ-овқат ва қишлоқ хўжалиги ташкилоти (FAO) ҳисоб-китобларига кўра, февраль ойи якунлари бўйича Озиқ-овқат нархлари индекси 1,6 фоизга ошди, бу асосий озиқ-овқат маҳсулотлари нархларининг ўсиши давом этаётганидан далолат беради.
FAO гўшт нархлари индексининг ўртача қиймати 118,0 пунктга етди, бу ўтган йилги даражадан 5,4 пунктга ёки 4,8 фоизга юқори. Ўсишнинг асосий сабаби – жаҳон бозорларида барқарор юқори талаб билан боғлиқ бўлган мол гўшти нархининг ошиши бўлди.
Изоҳ (0)