Ўзбекистонда инфляция яна ошди. Қайси маҳсулот ва хизматлар қимматлашмоқда?

Жорий йил мартида ойлик ва йиллик инфляция даражаларида ўсиш кузатилди. Бу ҳақда Статистика қўмитаси эълон қилган таҳлилда қайд этилган. 

2025 йил мартида товар ва хизматларнинг ойлик нархлари 0,9 фоизга кўтарилди. Биринчи чоракда (январь март ойларида) бу рақам 2,1 фоизга ошган. 2024 йил январь мартидаги кўрсаткич 1,7 фоизлик ўсган.

Март ойида йиллик инфляция даражаси 0,2 фоизга ошиб, 10,3 фоизга етди. Февралдаги кўрсаткич 10,1 фоиз, январдагиси 9,9 фоиз бўлганди. Биринчи чорак давомида йиллик инфляция 0,5 фоиз юқорилади. Охирги 12 ойда товар ва хизматлар 8 фоиздан 10,3 фоизга (жами 2,3 фоиз ўсган) қимматлашган. 

Ўтган ойда мамлакат миқёсида йиллик инфляция даражаси энг юқори ҳудуд Тошкент шаҳри бўлди — 12 фоиз. Энг паст кўрсаткич эса Сирдарё вилоятида қайд этилган — 8,6 фоиз.

Мартда озиқ-овқат инфляцияси бошқа товар ва хизматлар гуруҳларига нисбатан юқорироқ ўсди ва 1,5 фоизни ташкил этди. Ноозиқ-овқат маҳсулотлари нархлари 0,2 фоиз, хизматларники 0,7 фоизга ошди.

Ўтган ойда мол гўшти 8,3–8,8 фоиз, қўй гўшти 9,1 фоиз, гўшт қиймаси 5,4 фоизга қимматлашди. Товуқ гўшти нархлари 0,1-0,6 фоиз, тирик балиқ 1,7 фоизга ошди. Бошқа асосий турдаги маҳсулотлардан сариёғ 1,1 фоизга, сут 0,9 фоизга, спиртсиз ичимликлар нархлари 0,5 фоизга кўтарилди. Гуруч нархи эса 2,3 фоиз, буғдой уни 1,4 фоиз арзонлашди.

Мева-сабзавот маҳсулотлари нархлари динамикаси мавсумийлик омилига боғлиқ бўлди. Мевалар ва ёнғоқлар ой давомида сезиларсиз даражада қимматлашди (ўртача 0,1 фоизга). Сабзавотлар, илдизмевалилар ва дуккаклилар ўртача 0,3 фоизга, шу жумладан, сабзи 15,7 фоизга, помидор 4,3 фоизга, булғор қалампири 3,8 фоизга, карам ва саримсоқ 2,6 фоизга, пиёз 1,9 фоизга қимматлашди, дейилади қўмита ҳисоботида.

Қайд этилишича, ўтган ойда бодринг нархида 14,7 фоиз, картошкада 3,7 фоиз арзонлашиш кузатилган.

Мартда маиший чиқиндиларни олиб кетиш хизмати нархи республикада ўртача 4 фоизга ошди. Шу билан бирга, ҳаво транспортида йўловчиларни ташиш хизматлари нархи 4,4 фоиз қимматлашган. Жумладан, ички йўналишда самолёт чипталари нархи 3,9 фоиз, халқаро йўналишда 4,8 фоиз ўсган.

Автомобиль транспорти хизматлари 0,5 фоиз, темир йўл транспорти 0,4 фоизга қимматлашган. Мобил алоқа хизматлари нархи ўртача 3,5 фоизга ошган.

Февраль ойида аҳолининг келгуси 12 ойлик инфляцион кутилмалари январдагига (14,4 фоиз) қараганда ошиб, 15,3 фоизга етган хабар қилинганди. Аҳоли келаси бир йил давомида коммунал тўловлар, ёқилғи ва энергия ресурслари қимматлашишидан кўпроқ хавотир билдирган.