Ўзбекистонда 2024 йилда ялпи қишлоқ хўжалиги маҳсулоти ҳажми 444,6 триллион сўмга етди ва 5 йил ичида 18,5 фоизга ўсди, деб хабар бермоқда Макроиқтисодий ва ҳудудий тадқиқотлар институти.
Вазирлар Маҳкамаси ҳузуридаги ушбу институт мутахассислари қишлоқ хўжалигининг сўнгги 5 йилдаги ривожланишини таҳлил қилди. Унга кўра, сўнгги 5 йилда ялпи маҳсулотнинг ўртача йиллик ўсиш суръати 103,5 фоизни ташкил этди.
Ўзбекистоннинг қишлоқ хўжалиги соҳаси минтақада етакчи ўринни эгаллаб келмоқда: ялпи маҳсулот ҳажми Қозоғистон, Тожикистон ва Қирғизистоннинг кўрсаткичларидан юқори бўлиб, бу унинг кўлами ва стратегик аҳамиятини акс эттиради.
Жаҳон банки маълумотларига кўра, Ўзбекистонда қишлоқ хўжалигида банд бўлган бир кишига тўғри келадиган қўшилган қиймат дунёдаги ўртача даражадан 4,4 баравар юқори бўлиб, бу аграр секторнинг самарадорлиги ва унинг унумдорлиги ортиб бораётганини кўрсатади.
Мамлакат аҳолисининг фаол ўсишига қарамай, аҳоли жон бошига нисбатан қишлоқ хўжалигининг асосий турдаги озиқ-овқат маҳсулотларини ишлаб чиқариш барқарор ошиб бормоқда:
- дон экинлари — 238,2 килограмм (5 йил ичида +7,6 фоиз)
- картошка — 100,0 килограмм (+8,7 фоиз)
- сабзавотлар — 322,7 килограмм (+6,1 фоиз)
- мева ва резаворлар — 88,0 килограмм (+7,4 фоиз)
- узум — 49,1 килограмм (+2,9 фоиз)
- полиз экинлари — 72,2 килограмм (+17,2 фоиз)
- гўшт — 79,2 килограмм (+7,5 фоиз)
- сут — 334,8 килограмм (+4,9 фоиз)
- тухум — 236,9 дона (+2,4 фоиз).
Мутахассисларнинг қайд этишича, бу кўрсаткичларнинг ўсиши соҳа жадал ривожланаётгани ва озиқ-овқат хавфсизлигини таъминлаш бўйича эришилаётган муваффақиятдан далолат беради.
Ўзбекистонда 2025 йилда 4 миллион 800 минг гектарда экинлар етиштириш мўлжалланган. Шундан 2 миллион гектардан зиёд ерда мева-сабзавот, картошка, дуккакли ва полиз маҳсулотлари экилади. Уларнинг далаларда жойлаштирилиши ва ҳосилнинг захирага жамланиши мониторинг қилиб борилади. Хусусан, аҳолига бирламчи зарур бўлган 10 турдаги асосий озиқ-овқат маҳсулотларининг тизимли ҳисоб-китоби юритилади.
Изоҳ (0)