Германия меҳнат бозорига Ўзбекистондан мутахассисларни жалб қилишга қаратилган уч томонлама меморандум имзоланди, деб хабар бермоқда “Дунё” ахборот агентлиги.
Маълум қилинишича, Ўзбекистоннинг Берлиндаги элчихонасида уч томонлама англашув меморандумини имзолаш маросимида “Микрокредитбанк” Акциядорлик тижорат банки бошқарув раиси Ориф Бўтаев, International People IP GMbH and Co.KG компанияси раҳбари Томас Фёрстер бошчилигидаги делегация, дипломатлар, шунингдек, онлайн тарзда German Sparkassenstiftung for International Cooperation ташкилотининг Ўзбекистондаги раҳбари Матиас Ванглер иштирок этди.
Имзоланган меморандумга кўра, немис томони ўзбекистонлик мутахассисларни гастрономия, озиқ-овқат логистикаси, логистика ва гўшт маҳсулотларини қайта ишлаш саноати соҳаларида Германия корхоналарида ишлашга тайёрлаш учун дуал касбий таълим ўқув юртларида ўқиш жараёнини енгиллаштириш мақсадида тил курслари таклиф этади. Шунингдек, сараланган мутахассисларга виза ва бошқа ҳужжатларни расмийлаштириш, Германияда кутиб олиш, иш ва яшаш жойлари билан таъминлаш ва рўйхатдан ўтказиш ишларида яқиндан ёрдам беради.
“Тошкент шаҳрида компаниямизнинг International People Education GmbH тил ўқув маркази ўз фаолиятини бошлади. Ҳозирги кунда ўқув марказида немис тили билим даражасини аниқлаш бўйича халқаро тил сертификатлари олиш учун мўлжалланган тил курслари ҳамда касбга йўналтирилган махсус тил курсларига қатнашиш имконияти мавжуд”, деди ўқув маркази раҳбари Акбар Фахриев.
Немис компанияси делегациясининг 2025 апрель ойида Ўзбекистонга сафари, German Sparkassenstiftung for International Cooperation ваколатхонаси ва “Микрокредитбанк” билан биргаликда амалий ҳаракатлар режасини ишлаб чиқиши кутилмоқда.
Қайд этилишича, ушбу меморандум Ўзбекистон ва Германия ўртасида имзоланган миграция ва мобиллик соҳасида кенг қамровли шериклик тўғрисидаги битим ижросини таъминлаш йўлидаги навбатдаги амалий қадамлардан бири бўлиб хизмат қилади.
2024 йилнинг сентябрида ўзбекистонликлар учун Германияга миграция масаласида бир қатор енгилликлар ишлаб чиқилаётгани маълум қилинганди. Ўша йили Самарқандда бўлиб ўтган Ўзбекистон—Германия олий даражадаги музокаралари натижасида бир қатор ҳужжатлар имзоланганди. Улар орасида “Миграция ва мобиллик соҳасида ҳар томонлама шериклик тўғрисида” ҳукуматлараро битим ҳам бор эди.
Ўзбекистон олий ўқув юртлари ва касб-ҳунар коллежларининг дипломлари Германияда тан олинишига эришиш ҳам режалаштирилмоқда.
Изоҳ (0)