Рўзғорбоп гўшт 90–95 минг сўм — Қишлоқ хўжалиги вазирлиги Ўзбекистон гўшт арзон давлатлардан бирилигини эслатди

Мамлакат бозорларининг арзонлаштирилган расталарида 1 кг мол ва қўй гўшти ўртача 65–75 минг, савдо расталарида 90–95 минг сўмдан сотилмоқда. Бу ҳақда Қишлоқ хўжалиги вазирлиги баёнотида маълум қилинган.

Қишлоқ хўжалиги вазирлиги гўшт нархи қимматлашиши юзасидан расмий баёнот билан чиқди. Қайд этилишича, гўшт нархи ошиши глобал миқёсда кузатилмоқда. Бу дунёда гўшт ишлаб чиқариш ҳажми секинлашаётгани, йирик импортчи давлатларда талаб юқорилиги ва озуқа хом ашёси ва транспорт харажатлари ортиши билан боғлиқ.

“Масалан, Россияда товуқ гўшти нархи йил бошидан буён 9,7 фоизга, Қозоғистонда эса 4,7 фоизга ошган. Умуман олганда, Ўзбекистонда гўшт нархи минтақавий тенденциялар доирасида сақланмоқда ва глобал бозор тебранишларига нисбатан барқарорликни намоён қилмоқда”, деб ёзган вазирлик.

Баёнотда Ўзбекистон бозорларининг арзонлаштирилган расталарида 1 кг мол ва қўй гўшти ўртача 65–75 минг сўмдан, савдо расталарида 90–95 минг сўмдан, савдо марказларида 95–100 минг сўмдан сотилаётгани маълум қилинган.

“Тошкент шаҳридаги арзонлаштирилган расталарда 65–75 минг сўмлик гўштни харидорларнинг 15–18 фоизини, 90–95 минг сўмлик рўзғорбоп гўшт эса 82–85 фоизини, 110–130 минг сўмлик суйакциз (лаҳм) гўшт атиги 1–2 фоизини ташкил этади”, дея таҳлил қилган вазирлик.

Баёнот давомида Ўзбекистондаги нархлар айрим давлатлардаги рақамлар билан таққосланган.

“Россияда 1 кг мол гўшти 10–12, Беларусда 6–8, Қозоғистонда 7–11, Тожикистонда 8–10, Грузияда 9,5–12, Озарбайжонда 9,5–12,5, Туркияда 12–14 доллар, шунингдек, иқтисодиёти ривожланган давлатлар Швецияда 46,2, Исландияда 38,86, Жанубий Кореяда эса 28 доллар атрофида сотилмоқда”, қайд этилган таҳлилда.

Вазирликка кўра, Ўзбекистон дунёнинг гўшт энг арзон сотиладиган давлатлари қаторида бўлиб, Марказий Осиё мамлакатлари ичида Қирғизистондан кейинги иккинчи ўринни эгаллайди.

Баёнотда 2025 йил I чорагида гўшт нархига таъсир қилувчи ем—озуқа, электр энергияси ва ёқилғи–мойлаш материаллари қимматлашгани келтирилган.

“Чорвачиликда гўшт етиштириш учун кучли озуқага бўлган талаб юқорилиги, озуқа етиштириш учун ер майдонларининг етишмаслиги туфайли чорва молларини озуқа билан таъминланиш даражасининг 35-40 фоизини ташкил этмоқда. 2024 йил октябрь ойидаги нархлар билан солиштирилганда, бугунги кунда шрот нархи 3 минг сўмдан 7 минг сўмга, шелуха 2 800 сўмдан 4 минг сўмга, омухта ем 2 900 сўмдан 3 700 сўмга, буғдой 2 200 минг сўмдан 3 500 минг сўмга, маккажўхори силоси 500 сўмдан 900-1 000 сўмга, сомон 15 минг сўмдан 25 минг сўмга, беда эса 25 минг сўмдан 45 минг сўмга ошган. Озуқа харажатлари, меҳнатга ҳақ тўлаш ва электр энергияси харажатларининг ошиши ҳам гўшт таннархига бевосита таъсир кўрсатаётганини алоҳида таъкидлаш зарур”, дея баён этган вазирлик.

Вазирликнинг маълум қилишича, 2024 йилда Ўзбекистонда умумий 2,9 млн тонна тирик вазнда (1,7 млн тонна сўйилган вазнда) гўшт ишлаб чиқарилган. Жами 93 минг тонна гўшт импорт қилинган. Ишлаб чиқарилган гўштга нисбатан импорт салмоғи 5,4 фоизни ташкил этган.

Импорт қилинган гўштнинг 70 фоизи қайта ишлаш корхоналарига йўналтирилган бўлса, қолган қисми Тошкент шаҳри деҳқон бозорларидаги арзонлаштирилган расталарда сотилган.

Маълумот учун, Ўзбекистон ўртача 4 доллардан гўшт импорт қилмоқда. Импортнинг жуда катта қисми Беларусь ва Қозоғистон ҳисобига тўғри келади. Уч ойдан буён сўровларда гўшт энг кўп қимматлаган маҳсулот ўлароқ саналмоқда.

Март ойида Ўзбекистондаги гўшт нархи МДҲ давлатларига нисбатан қимматлиги маълум қилинган эди.

Статистика агентлиги таҳлилига қараганда, гўшт нархлари январдан бери ҳар ой ошиб бормоқда. Марказий банк сўровларида ҳам аҳоли томонидан гўшт қимматлашгани билдирган.

Иқтисодиёт ва молия вазирлиги ўрганишларига кўра, Тошкент шаҳридаги бозорларда мол гўштининг улгуржи нархи 73 минг сўмдан 95 минг сўмгача, қўй гўшти эса 83 минг сўмдан 95 минг сўмгача ташкил этмоқда.