Тошкент вилоятида ичимлик суви ва оқова хизматлар бўйича янги тўлов таърифлари жорий қилинди. Бу ҳақда вилоят ҳокимлиги хабар берди.
Унга кўра, Тошкент вилоятида 1 июлдан бошлаб, Халқ депутатлари вилоят кенгаши томонидан ичимлик суви ва оқова хизматлар бўйича янги тўлов таърифлари тасдиқланди. Қуйидаги жадвал орқали “Тошкент вилояти сув таъминоти” АЖ, “Мусаффо оби ҳаёт магистрал сув таъминоти” АЖ, “Чимган-Чорбоғ магистрал сув таъминоти” АЖларда ўзгарган таъриф суммалари билан танишиш мумкин.
Унга кўра:
Ичимлик суви:
- а) аҳоли учун –1 м3 – 2600 сўм;
- б) бюджет ташкилотлари учун - 1м3 – 15 000 сўм;
- в) улгуржи истеъмолчилар учун - 1м3 - 15 000 сўм;
Оқова сув хизмати:
- а) аҳоли учун – 1 м3 – 1 300 сўм;
- б) бюджет ташкилотлари учун - 1м3 – 3 000 сўм;
- в) улгуржи истеъмолчилар учун - 1м3 – 3 000 сўм.
Нархлар қўшимча қиймат солиғисиз.
Ўзбекистонда 2025 йилнинг 1 январь ҳолатига 5,8 млн квартира (уй)лар ичимлик суви билан таъминланган. Квартира (уй)ларнинг ичимлик суви билан таъминланганлик даражаси 77,1 фоизни ташкил этди (2024 йил 1 январь ҳолатига — 75 фоиз).
“Ўзсувтаъминот” берган маълумотга кўра, Ўзбекистонда 2025 йилда 715 минг аҳолига илк бор тоза ичимлик суви етиб боради. Жорий йилда 1 619 километр ичимлик суви, 521 километр оқова сув тармоқларини тортиш, тизимдаги 162 та иншоотни қуриш ва реконструкция қилиш режалаштирилган.
2025 йил январь ойи ҳолатига кўра, Ўзбекистон аҳолисининг 80,9 фоизи марказлашган ичимлик суви билан таъминланган. Сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг километр ичимлик суви тармоқлари тортилди.
Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.
Изоҳ (0)