Антарктидадаги пингвин колониялари глобал исиш таъсирини камайтиришга қодир. Ушбу жонзотларнинг чиқиндиси аммиак ажратиб чиқаради, аммиак эса булутлар ҳосил бўлишига ёрдам беради. Бу ҳақида Communications Earth & Environment журналида чоп этилган илмий мақолада маълумот берилди.
Тадқиқот Ҳелсинки шаҳридаги бир гуруҳ олимлар томонидан Меттю Боер раҳбарлигида олиб борилган. 2023 йил январдан мартгача улар Аделия пингвинларининг 60 минг бошли колониясини кузатиб борган, бу пингвинларнинг энг кенг тарқалган турларидан биридир.
Олимлар ҳаво таркибидаги аммиак миқдорини ўрганиб, шундай хулосага келишди: шамол пингвинлар яшайдиган томонидан эсган пайтда аммиак даражаси анча юқори бўлган. Маълум бўлишича, бундай аммиак сув буғи конденсацияси ва булутлар ҳосил бўлиши учун зарур бўлган майда заррачалар — аэрозоллар пайдо бўлишини кучайтиради.
Бундан ташқари, пингвин нажосатидан ажраладиган диметиламин моддаси аэрозоллар ҳосил бўлишини 10 минг баробаргача тезлаштириши аниқланган. Бу эса Антарктида музликлари ва Қуёш иссиқлиги ўртасида ўзига хос ҳимоя қатламини вужудга келтиради.
“Мазкур тадқиқот экотизимлар ва атмосфера жараёнлари ўртасида чуқур боғлиқлик борлигини ҳамда улар маҳаллий иқлимга бевосита таъсир кўрсатишини кўрсатади”, деб ёзади олимлар.
Изоҳ (0)