Ўзбекистонда йил бошидан буён 4 000 га яқин ноқонуний чиқинди ташлаш ҳолати аниқланди, деб хабар бермоқда Экология вазирлиги.
Унда айтилишича, 2025 йилнинг дастлабки 4 ойида республикада ўрнатилган онлайн кузатув камералари орқали жами белгиланмаган жойларга чиқинди ташлаш билан боғлиқ жами 3 743 та ҳуқуқбузарлик аниқланган.
Қайд этилишича, айни дамда Экология вазирлиги Ситуацион маркази томонидан республика миқёсида жами 250 та онлайн кузатув камералари ўрнатилган бўлиб, тун-у кун назорат қилинади.
Онлайн камералар орқали нафақат ноқонуний чиқинди ташлаш, балки бошқа турдаги ҳуқуқбузарликларни ҳам ўз вақтида аниқлаш ва чора кўриш имконини беради. Ҳуқуқбузарликларга нисбатан қонуний тартибда тегишли чоралар кўрилмоқда.
Ўзбекистонда 80 гектардан ортиқ ер майдони чиқинди полигонларидан табиатга қайтарилди. Ҳозир чиқиндихоналарда атмосферага чиқарилаётган ташланмаларни мониторинг қилиш, ёнғин хавфсизлигини таъминлаш бўйича сув ҳавзаси, санитар бурчаклар, қоровулхона, ҳожатхона ҳамда сув қудуқлари, дизбарер қурилмаси барпо этилиб, узлуксиз электр ва ичимлик суви таъминотига эътибор қаратиляпти.
Жумладан, Экология вазирлиги Чиқиндиларни бошқариш ва циркуляр иқтисодиётни ривожлантириш агентлиги ҳузуридаги Чиқинди полигонларини бошқариш дирексияси томонидан полигонлардаги 300 га яқин махсус техникаларга замонавий GPS назорат тизими ўрнатилган. Давлат бюджети маблағлари ҳисобидан қўшимча 78 та махсус техника харид қилиниб, ҳудудларга тарқатилган.
Ҳозирда жами 184 та маиший чиқинди полигонидан 39 таси тартибга келтирилиб, ўртача 70-80 см тупроқ қатлами билан ёпилди, аҳоли саломатлиги, атроф-муҳит ва экологияга салбий таъсирига чек қўйилиб, ерлар табиатга қайтарилди.
Жорий йилнинг биринчи чорагида Тошкент, Наманган, Андижон, Бухоро, Сирдарё, Самарқанд, Фарғона ва Қашқадарё вилоятларининг жами 14 та туманда жойлашган қаттиқ маиший чиқинди полигонларида суриш, зичлаш, текислаш ишлари амалга оширилди. 37 та чиқинди полигони автотарози ва кузатув камералари билан жиҳозланмоқда.
Шунингдек, 2025 йил давомида 18 та чиқинди полигонини рекултивация қилиб, тупроқ қатлами билан ёпиш мақсад қилинган.
“Яшил макон” умуммиллий дастури доирасида республика бўйича 2024 йилда 123 та чиқинди полигони атрофида 461,0 минг туп ҳамда 2025 йил баҳор мавсумида 130 та чиқинди полигони атрофида 367,7 минг туп терак, тут, қайрағоч, саксовул, тол ва бошқа турдаги дарахт кўчатлари экилиб, “яшил белбоғ”лар ташкил этилди.
Изоҳ (0)