Ироқнинг сув захиралари қурғоқчил ёмғир мавсумидан сўнг 80 йил ичидаги энг паст даражага тушиб кетди. Бу ҳақда ҳукумат вакилига таяниб Al Arabiya хабар берди.
Захиралар камайишига Дажла ва Фрот дарёларидан келадиган сув улушининг камайиши сабаб бўлмоқда. Сув масаласи иқлим ўзгариши, қурғоқчилик, ҳароратнинг кўтарилиши ва ёғингарчилик миқдорининг пасайиши туфайли жиддий экологик инқирозни бошдан кечираётган 46 миллион аҳолига эга мамлакатда асосий муаммога айланган.
Расмийлар қўшни Эрон ва Туркияда қурилган юқори оқимдаги тўғонларни Ироқни минг йиллар давомида суғориб келган Дажла ва Фрот дарёлари оқимини кескин камайтиришда айбламоқда.
Ёз мавсумида сув камида 18 миллиард куб метр бўлиши керак эди... аммо бизда атиги 10 миллиард куб метр мавжуд. Ўтган йили стратегик захираларимиз анча яхши эди. У ҳозирги миқдордан икки баробар кўп эди. Биз 80 йил давомида бундай паст захирани кўрмаган эдик. Ироқ ҳозирги кунда Дажла ва Фрот дарёларидан ўзига тегишли сув улушининг 40 фоизидан ҳам камроғини олмоқда, деди Сув хўжалиги вазирлиги матбуот котиби Холид Шамал.
У бунинг асосий сабаби икки дарёдан келадиган сув оқимининг камайиши эканини таъкидлади. Шамал 2025 йил қишда ёғингарчиликнинг кам бўлиши натижасида сув сатҳи пасайиши Ироқдаги вазиятни ёмонлаштирганини айтди.
Сув танқислиги Ироқдаги кўплаб фермерларни ерни ташлаб кетишга мажбур қилган. Ҳокимият ичимлик суви билан етарли даражада таъминлаш учун фермерлик фаолиятини кескин камайтирган.
Ироқда қишлоқ хўжалиги режалаштируви ҳар доим сувга боғлиқ бўлади, бу йил эса 1,5 миллиондан ортиқ ироқий дунам (375 минг гектар) “яшил ҳудудлар ва ҳосилдор ерлар”ни сақлаб қолиш мақсад қилинган. Ўтган йили ҳукумат деҳқонларга маккажўхори, гуруч ва боғлар етиштириш учун 2,5 миллион дунам ер ажратган эди, деди Шамал.
Сув Ироқ ва Туркия ўртасидаги кескинлик манбайи бўлиб келган, бу эса Бағдодни самарали сув хўжалиги режаларини қабул қилишга ундаган. 2024 йилда Ироқ ва Туркия ўзаро “10 йиллик ҳамкорлик доирасидаги келишув”ни имзолади. Бу, асосан, сув ресурсларини яхшироқ бошқариш учун лойиҳаларга сармоя киритишни кўзда тутади.
Изоҳ (0)