Кўпчилик чойга лимон қўшиб ичишни соғлиқ учун фойдали деб ҳисоблайди — бу иммунитетни мустаҳкамлаши, шамоллашдан ҳимоя қилиши ва тетиклантириши мумкин, деган фикр кенг тарқалган. Аммо мутахассислар бу одат ҳар доим ҳам фойда келтирмаслигини, айрим ҳолларда эса соғлиқ учун хавфли бўлиши мумкинлигини таъкидлашмоқда. Қуйида лимонли чой ичишнинг эҳтимолий салбий оқибатлари ҳақида сўз юритамиз.
Тишларни емиради
Лимон C витаминига бой бўлиб, бу тиш ва милклар учун фойдали. Бироқ стоматологлар ҳаддан ортиқ лимонли чой ичиш тишларга зарар етказишидан огоҳлантиришмоқда. Стоматолог шифокор Галина Гурянованинг тушунтиришича, ҳар қандай кислотали ичимлик тиш эмалига салбий таъсир кўрсатади:
Тадқиқотларга кўра, кислотали ичимликлар тиш эмалини емиради. Ичимликдаги кислота даражаси қанчалик юқори бўлса, тиш саломатлиги учун шунчалик зарарли бўлади. Лимон шарбатининг кислоталилик даражаси (pH) 2-3 атрофида, иссиқ сув эса бу таъсирни кучайтиради. Лимонли чой тишларга ҳатто газланган ичимликларга қараганда кўпроқ зарар етказади, дейди доктор.
Шунинг учун стоматологлар лимонли чой ичгач, оғизни сув билан чайишни тавсия қилади.
Ошқозон-ичак касалликлари бўлганларга хавфли
Лимонли чой цитрус меваларга аллергияси борлар ҳамда ошқозон кислоталилиги юқори бўлган одамларга тавсия этилмайди. Ҳомиладор аёллар ҳам, айниқса, кўнгил айниши ёки жиғилдон қайнашидан азият чекса, ундан воз кечишлари керак. Лимон кислотаси ошқозон шиллиқ қаватини безовта қилади. Шунингдек, бу ичимликни ўт пуфаги тошлари, гастрит, ошқозон яраси касаллиги мавжуд бўлганда тавсия этилмайди.
Оч қоринга ичиш мумкин эмас
Лимонли чойни оч қоринга ичиш тавсия этилмайди. Ундаги мевали кислота ошқозон шираси билан реакцияга киришиб, жиғилдон қайнашига олиб келади. Яна бир жиҳат: чойдаги кофеин ошқозонда туз кислотаси ажралишини кучайтириб, тез-тез истеъмол қилинса, деворларининг яллиғланишига сабаб бўлади.
Чой турлари ҳақида қизиқарли маълумот
Чой фақат кўк ёки қора бўлади, деган тасаввур кенг тарқалган. Аслида эса, чой баргларининг қай даражада ферментациядан ўтганига қараб олти асосий турга бўлинади: қора, яшил, оқ, пуэр, улун ва сариқ чой.
- Қора чой тўлиқ ферментацияланган бўлиб, энг кучли таъм ва рангга эга.
- Кўк чой эса деярли ферментацияланмаган, энг кўп антиоксидант сақловчи чой туридир.
- Оқ чой — энг нозик ва энг кам ишлов берилади, уни махсус шароитда қуритишади.
- Улун — ярим ферментацияланган чой бўлиб, қора ва яшил чой орасидаги “олтин ўрта” ҳисобланади.
- Пуэр — махсус ферментациядан ўтган, йиллар давомида етилиши мумкин бўлган чой. Унинг таъми вақт ўтган сайин бойийди.
- Сариқ чой эса энг ноёб турлардан бири бўлиб, ўзига хос майин таъмга эга ва асосан Хитойда ишлаб чиқарилади.
Ҳар бир чой тури нафақат таъми билан, балки соғлиққа таъсири билан ҳам фарқланади. Масалан, улунлар кўп миқдорда антиоксидант сақлайди, пуэрлар эса ёғ йўқотишга ёрдам бериши мумкин.
Изоҳ (0)