O‘zbekistonda 2025-yilda 715 ming aholiga ilk bor toza ichimlik suvi yetib boradi. Bu haqda AOKAda o‘tkazilgan brifingda “O‘zsuvtaʼminot” AJ axborot xizmati rahbari ma’lum qildi.
Keltirilishicha, joriy yilda 1 619 kilometr ichimlik suvi, 521 kilometr oqova suv tarmoqlarini tortish, tizimdagi 162 ta inshootni qurish va rekonstruksiya qilish rejalashtirilgan. Bularning natijasida 715 ming aholiga ilk bor markazlashgan toza ichimlik suvi yetib boradi, 135 ming xonadon oqova tarmog‘iga ulanadi, 157 ming iste’molchiga zamonaviy hisoblagich o‘rnatiladi.
Bundan tashqari, davlat rahbarining Fransiyaga tashrifi doirasida Surxondaryo va Qashqadaryo viloyatlarida ichimlik suvi bo‘yicha 340 million yevrolik 3 ta loyiha kelishildi.
Sohani raqamlashtirish uchun Osiyo taraqqiyot bankidan 125 million dollar jalb qilinishi belgilangan. Besh yilda yirik suv inshooti va magistral quvurlarga 4 800 ta “aqlli” hisoblagich, 2 800 ta telemetriya tizimi o‘rnatish ko‘zda tutilgan.
Respublika va 14 ta hududiy suv ta’minoti korxonalarida yagona situatsion markaz tashkil etish orqali avariyalarni tezkor bartaraf qilish tizimi joriy etiladi.
O‘zbekistondagi barcha ichimlik suvi ta’minoti korxonalarida sifat monitoringini yuritish va ma’lumotlarni boshqarish markazlarini yaratish rejalashtirilgan. 2025-yil yanvar oyi holatiga ko‘ra, O‘zbekiston aholisining 80,9 foizi markazlashgan ichimlik suvi bilan ta’minlangan. So‘nggi 6 yilda aholining ichimlik suvi taʼminotini yaxshilashga 10 trillion so‘mga yaqin mablag‘ yo‘naltirildi. Ushbu mablag‘lar hisobidan 1 176 ta suv inshooti va 20,8 ming kilometr ichimlik suvi tarmoqlari tortildi.
O‘zbekistonda 2026-yilda markazlashgan ichimlik suvi bilan taʼminlanganlik 90 foizga, oqova suv xizmati bilan qamrab olinganlik darajasi 35 foizga yetkaziladi.
Mutaxassislar ogohlantirishicha, Markaziy Osiyo mintaqasi suvni isrofgarchilik bilan sarflash oqibatida tobora kuchayib borayotgan suv inqiroziga duch kelmoqda. 2028-yilga kelib suv tanqisligi surunkali tus olishi mumkin.
Izoh (0)