Бразилияда кунига уч литрдан кола ичган эркакнинг қовуғидаги 35 та тош олиб ташланди. Бу ҳақда Daily Mail хабар берди.
Бразилиялик уролог Талес Андраде бемор ҳақида маълумот берган. У бундай патология сабабларидан бири газланган ичимликларни ҳаддан зиёд истеъмол қилиш эканини айтган. Жумладан, эркак кунига уч литргача кола ичган.
Шифокорнинг тушунтиришича, мунтазам равишда газланган ичимликлар ичиш сийдик ажратиш тизими учун жиддий оқибатларга олиб келади. Кола таркибида кўп миқдорда қанд ва фосфат кислотаси мавжуд, улар пешобнинг кислоталилигини оширади ва тош ҳосил бўлишига сабаб бўлади. Шу сабабли беморда сийдик-тош касаллигининг оғир шакли ривожланган.
Буйракда ҳосил бўлган тошлар қовуққа ўтиб, кучли оғриқ, сийдик ажралишининг бузилиши, сийдикда қон бўлиши ва бошқа нохуш ҳолатларни келтириб чиқариши мумкин. Агар улар ўз вақтида даволанмаса, яллиғланиш ва ҳатто буйрак етишмовчилигига олиб келиши мумкин.
Андраде соғлом овқатланиш ва етарли миқдорда сув истеъмол қилиш муҳимлигини таъкидламоқда. У одамларни сув ўрнига газли ичимликларни ичиш одатидан воз кечишга чақирган. Айниқса, қорин ёки орқа соҳада ноқулайликлар ҳамда сийдик чиқаришда муаммолар бўлса.
Изоҳ (0)