Ўзбекистонда Осиё тараққиёт банки (ОТБ) иштирокида 23 та янги лойиҳани амалга оширилади. Бу ҳақда Инвестициялар, саноат ва савдо вазирлиги матбуот хизмати хабар берди.
Италиянинг Милан шаҳрида бўлиб ўтган Осиё тараққиёт банки бошқарувчилар кенгашининг 58 йиллик йиғилишида 2025–2026 йиллар учун умумий қиймати 3,6 миллиард доллар бўлган 23 та янги лойиҳани амалга ошириш дастури имзоланди.
Лойиҳалар таълим, ичимлик суви таъминоти, транспорт ва молиявий-техник ёрдам соҳалари каби ижтимоий-иқтисодий ривожланишнинг асосий йўналишларини қамраб олади.
Хабарда қайд этилишича, ташрифнинг асосий натижаси — 2025–2026 йиллар давомида ОТБ Бошқарувчилар кенгаши раиси ваколати Ўзбекистонга ўтиши ҳақида расмий эълон қилиниши бўлди. Тадбирда қатнашган Жамшид Хўжаев кенгаш раиси сифатида тасдиқланди, бу эса Ўзбекистонга етакчи халқаро молия институтлари томонидан билдирилаётган юқори ишончнинг ёрқин тасдиғи бўлди.
Йиғилиш якунларига кўра, ОТБ бошқарувчилар кенгашининг 59 йиллик йиғилиши 2026 йил май ойида Самарқанд шаҳрида ўтказилиши ҳақида якдил қарор қабул қилинди.
Ўзбекистон Осиё тараққиёт банкига 1995 йилда аъзо бўлган ва ўшандан бери банк мамлакатга қарз, грант ва техник кўмак тақдим этиб келмоқда.
ОТБ Ўзбекистонга ажратган сўнгги маблағлар
2024 йил июлида ОТБ Ўзбекистонга ҳомиладор аёллар ва уларнинг янги туғилган чақалоқлари учун перинатал соғлиқни сақлаш хизматларини яхшилашга кўмаклашиш учун 100 миллион доллар миқдорида имтиёзли кредит ажратишни маъқуллади.
Ўша йилнинг августида ОТБ Ўзбекистон ҳукуматининг мамлакат молия бозорларини мустаҳкамлаш ва барқарор бозорга йўналтирилган энергетика секторини ривожлантириш бўйича ташаббусларини қўллаб-қувватлаш учун умумий қиймати 400 миллион доллар бўлган иккита қарз ажратди.
Ноябрь ойида ОТБ Ўзбекистоннинг иқлим ўзгаришига мослашиш ва яшил иқтисодий ўсишни қўллаб-қувватлаш мақсадида 250 миллион доллар миқдорида кредит ажратди.
2025 йил февралида ОТБ Ўзбекистонда сув ресурсларини бошқаришни модернизация қилиш учун 125 миллион доллар миқдорида кредит ажратди. Лойиҳа доирасида “Ўзсувтаъминот” АЖ ва унинг ҳудудий филиаллари учун сув таъминоти ва канализация инфратузилмаси рақамлаштирилади, бу эса сувдан фойдаланиш самарадорлигини оширади ва энергия сарфини камайтиради.
Изоҳ (0)