Хоразм вилоятида 5 июндан ичимлик ва оқова сув хизматлари нархлари ошиши маълум қилинди.
Хабар берилишича, 5 июндан Халқ депутатлари Хоразм вилоят кенгашининг қарорига биноан янги тарифлар тасдиқланди.Унга кўра 2025 йилнинг 5 июнидан қуйидаги белгиланган тарифлар амалда қўлланилади:
Ичимлик суви:
- аҳоли учун — 1 м3 – 4 500 сўм;
- бюджет ташкилотлари учун — 1м3 – 10 400 сўм;
- улгуржи истеъмолчилар учун — 1м3 – 10 400 сўм;
Оқова сув хизмати:
- аҳоли учун — 1 м3 – 1 850 сўм;
- бюджет ташкилотлари учун — 1м3 – 3 800 сўм;
- улгуржи истеъмолчилар учун — 1м3 – 3 800 сўм.
Нархлар қўшимча қиймат солиғисиз кўрсатилган.
Қайд этилишича, ичимлик ва оқова сув хизматлари учун олдиндан тўлов амалга оширилган тақдирда икки ой давомида эски тарифлар бўйича ҳисоб-китоб юритилади.
Хоразм вилоят аҳолисининг ичимлик суви билан таъминланганлик даражаси 2017 йил 52,2 фоизни ташкил этган бўлса 2025 йилнинг 1 январь ҳолатига ушбу кўрсаткич 91,6 фоизга етказилди. Жорий йил якуни билан эса 92 фоизга етказилиши кутилмоқда.
Ўзбекистонда 2025 йилнинг 1 январь ҳолатига 5,8 млн квартира (уй)лар ичимлик суви билан таъминланган. Квартира (уй)ларнинг ичимлик суви билан таъминланганлик даражаси 77,1 фоизни ташкил этди (2024 йил 1 январь ҳолатига — 75 фоиз).
“Ўзсувтаъминот” берган маълумотга кўра, Ўзбекистонда 2025 йилда 715 минг аҳолига илк бор тоза ичимлик суви етиб боради. Жорий йилда 1 619 километр ичимлик суви, 521 километр оқова сув тармоқларини тортиш, тизимдаги 162 та иншоотни қуриш ва реконструкция қилиш режалаштирилган.
2025 йил январь ойи ҳолатига кўра, Ўзбекистон аҳолисининг 80,9 фоизи марказлашган ичимлик суви билан таъминланган. Сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг километр ичимлик суви тармоқлари тортилди.
Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.
Изоҳ (0)