Наманган вилоятида ичимлик ва оқова сув хизматлари нархи қайта кўриб чиқилди. Бу ҳақда 21 февраль куни вилоят ҳокимлиги матбуот хизмати хабар берди.
Қайд этилишича, 2024 йил 30 январь куни вилоят ҳокими “Наманган сув таъминоти” АЖда бўлиб, аҳолини тоза ичимлик суви билан таъминлаш масаласида олиб борилаётган ишлар, бу борада устувор вазифалар ижросини муҳокама қилган. Ўшанда соҳа мутахассислари вилоят раҳбарига аҳоли учун 1 метр куб ичимлик сувга 4000 сўм нарх белгилашни таклиф этганди.
Шавкатжон Абдураззоқов бу суммани камайтириш учун топшириқ бериб, унинг манбаларини ҳам кўрсатиб ўтди. Жумладан, энг аввало, тизимдаги “режалаштирилган йўқотиш” кўрсаткичларини камайтириш лозимлигини уқтирди.
Шундан келиб чиқиб, “Наманган сув таъминоти” АЖ томонидан ичимлик ва оқова сув таърифлари қайта кўриб чиқилиб, тегишли хулосага кўра:
аҳолига 1 метр куб:
- ичимлик сув учун — 3500 сўм;
- канализация хизмати учун — 800 сўм;
бюджет ва бошқа ташкилотларга:
- ичимлик суви — 7000 сўм;
- канализация хизмати — 975 сўм деб белгилаш таклиф этилди.
Депутатлар бу масала юзасидан фикр-мулоҳазаларини билдириб, янги таърифларни тасдиқлади.
Маълумот учун, Наманган вилоятида ичимлик суви учун аҳоли 2550 сўм, корхона-ташкилотлар эса 3315 сўм тўлаб келаётганди. Бу нархлар 2020 йил декабрида белгиланган ва шундан бери ўзгармаган.
Изоҳ (0)