Оксфорд университети олимлари томонидан олиб борилган янги тадқиқот мунтазам пиёда юриш хавфли ўсимталар пайдо бўлиши хавфини сезиларли даражада камайтиришини исботлади. Тадқиқот натижалари British Journal of Sports Medicine журналида чоп этилди.
Мутахассислар Буюк Британияда яшовчи 85 мингдан ортиқ инсоннинг саломатлигини олти йил давомида кузатиб борди ва олинган маълумотларни таҳлил қилди. Аниқланишича, жисмоний фаоллиги энг юқори бўлган иштирокчиларда саратон касаллиги ривожланиш хавфи анча паст бўлган. Кунига 5 минг қадам босиб ўтган иштирокчиларда ижобий натижалар кузатилган. 7 минг қадам юрганларда хавф 11 фоизга, 9 минг қадамда эса 16 фоизга камайган. Бир кунда босиб ўтилган масофа бундан ҳам юқори бўлган шахсларда хавфнинг камайиш кўрсаткичи сезиларли бўлмаган.
Тадқиқотчилар юриш тезлигининг таъсирини ҳам баҳолашган, бироқ у деярли аҳамиятсиз бўлиб чиққан. Мунтазам пиёда юриш жигар, эндометрий (бачадон ички қавати), ошқозон, сийдик пуфаги, ўпка, мия ва бўйин саратонларига чалиниш хавфини камайтириши кузатилган.
Муаллифлар таъкидлашича, олдинги тадқиқотлардан фарқли ўлароқ, бу ишда сўровномалар эмас, балки фитнес-трекерлар орқали олинган маълумотлар ишлатилган. Бу эса аниқроқ ва ишончлироқ натижаларни олишга имкон берган.
Изоҳ (0)