Oksford universiteti olimlari tomonidan olib borilgan yangi tadqiqot muntazam piyoda yurish xavfli o‘simtalar paydo bo‘lishi xavfini sezilarli darajada kamaytirishini isbotladi. Tadqiqot natijalari British Journal of Sports Medicine jurnalida chop etildi.
Mutaxassislar Buyuk Britaniyada yashovchi 85 mingdan ortiq insonning salomatligini olti yil davomida kuzatib bordi va olingan ma’lumotlarni tahlil qildi. Aniqlanishicha, jismoniy faolligi eng yuqori bo‘lgan ishtirokchilarda saraton kasalligi rivojlanish xavfi ancha past bo‘lgan. Kuniga 5 ming qadam bosib o‘tgan ishtirokchilarda ijobiy natijalar kuzatilgan. 7 ming qadam yurganlarda xavf 11 foizga, 9 ming qadamda esa 16 foizga kamaygan. Bir kunda bosib o‘tilgan masofa bundan ham yuqori bo‘lgan shaxslarda xavfning kamayish ko‘rsatkichi sezilarli bo‘lmagan.
Tadqiqotchilar yurish tezligining ta’sirini ham baholashgan, biroq u deyarli ahamiyatsiz bo‘lib chiqqan. Muntazam piyoda yurish jigar, endometriy (bachadon ichki qavati), oshqozon, siydik pufagi, o‘pka, miya va bo‘yin saratonlariga chalinish xavfini kamaytirishi kuzatilgan.
Mualliflar ta’kidlashicha, oldingi tadqiqotlardan farqli o‘laroq, bu ishda so‘rovnomalar emas, balki fitnes-trekerlar orqali olingan ma’lumotlar ishlatilgan. Bu esa aniqroq va ishonchliroq natijalarni olishga imkon bergan.
Izoh (0)