Микропластик нафас олиш ўпканинг асосий иммун ҳужайралари — алвеоляр макрофаглар фаолиятини издан чиқаради. Бу ҳақда олимлар ATS 2025 анжуманида маълум қилган.
Олимлар ушбу ҳужайраларнинг микропластик билан алоқадан атиги 24 соат ўтгач, бактерияларга қарши курашиш қобилияти пасайиши тўғрисидаги маълумотларни тақдим этдилар.
Макрофаглар — ўпка тўқимасининг ўзига хос тозаловчиларидир: улар патогенларни йўқ қилади, ўпкани нобуд бўлган ҳужайралардан тозалайди ва иммунитет мувозанатини сақлайди. Ҳужайра културалари ва кемирувчилар устида олиб борилган тадқиқотлар шуни кўрсатдики, микропластик нафақат уларнинг фаолиятини сусайтиради, балки жигар, талоқ, ичак ва ҳатто мияда ҳам тўпланиш хусусиятига эга. Бу бутун организм учун узоқ муддатли оқибатларга олиб келиши мумкин.
Микропластика таъсиридан сўнг иммун тизим фаолиятини қисман тиклаш АМФ-киназа фаоллаштирувчиси — акадезин препарати ёрдамида амалга оширилган.
Олимларнинг фикрича, келажакда бундай воситалар ҳавоси ифлосланган ҳудудларда яшовчи аҳоли орасида ўпка касалликларининг олдини олишда қўлланилиши мумкин. Кейинги босқич саратон ва нафас олиш тизимининг бошқа касалликлари хавфи биомаркерларини аниқлаш учун беморларнинг ўпка тўқималарини ўрганиш бўлади.
Бразилиялик олимлар табиий қариш ва деменция билан боғлиқ когнитив бузилишларни бартараф этишга қодир молекулани аниқлашгани хабар қилинганди. Aging Cell журналида эълон қилинган тадқиқот натижаларига кўра, миянинг ёрдамчи ҳужайралари — астроцитлар томонидан ишлаб чиқариладиган хевин номли модда сичқонларда нейронлар ўртасидаги алоқалар сифатини яхшилайди ва хотирани тиклайди.
Бундан аввал Сан Антониодаги Техас университети Тиббиёт фанлари маркази олимлари тўққиз соат ва ундан ортиқ давом этадиган тунги уйқу когнитив функцияларнинг ёмонлашишига олиб келиши мумкинлиги, бу таъсир депрессия аломатлари бўлган одамларда яққол намоён бўлиши ҳақида хабар берилганди.
Изоҳ (0)