Кастилия Ла-Манча университетининг испан олимлари пиёда юришнинг фойдалари бўйича янги тадқиқотлар натижасини эълон қилди. Мутахассислар хулосасига кўра, кунига 10 минг қадам юриш депрессия хавфини сезиларли даражада камайтиради. Инсон кунига қанчалик кўп пиёда юрса, тушкунликка тушиш эҳтимоли шунчалик камаяди, деб ёзади Medical Хpress.
Олимлар турли мамлакатлардан келган 96 минг нафар ўрта ва катта ёшли инсонлар ҳақидаги маълумотларни ўз ичига олган 33 та тадқиқотни кўриб чиқди. Маълумотларни тўплаш учун ҳар бир қадам сонини кузатишга мўлжалланган фитнес билагузукларидан фойдаланилган.
Дастлабки тадқиқотлар сифатида беш минг қадам юрган одамлар текширилди. Маълум бўлишича, 5 минг ва ундан кўп қадам юрганларда депрессияга тушиш эҳтимоли 9 фоизга камайган. Кунига етти минг қадам юрадиганлар эса кунига 5 минг қадам ёки ундан кам масофа босадиганларга қараганда депрессия хавфи 31 фоизга кам бўлган.
“Агар кунлик юришлар кўрсаткичи 7500 қадамдан ортиқ бўлса, депрессия хавфи 43 фоизга камаяди. Мазкур натижа барча ёш гуруҳларига мансуб аёллар ва эркаклар учун бирдек мос келади”, дейди Эстела Ҳименез-Лопес исмли мутахассис.
Аммо кунига 10 минг қадам юриш 7 минг билан бирдек фойдали ҳисобланади ва тушкунликка тушиш эҳтимолини янада камайтирмайди.
Жисмоний фаоллик табиий антидепрессант эканлиги аввалдан маълум эди, бироқ айнан узоқ масофага юриш аэробика, оғир атлетика, йога ва тай-чи (Хитой жанг санъати) каби мураккаб спорт турларидек бирдек фойдали эканлиги исботланди ва депрессияга қарши курашнинг самарали усуллари билан тенглаштирилди.
Изоҳ (0)