Дунёда ўткир озиқ-овқат тақчиллиги сабабли қарийб 300 миллион киши очликдан ўлиш мумкин. Бу ҳақда янги таҳлил маълумотларига таяниб, The Guardian хабар берди.
Урушнинг кучайиши, гуманитар ёрдам қисқариши, иқлим ва иқтисодий зарбалар 2024 йили 13,7 миллион кишининг сурункали озиқ-овқат танқислиги шароитида қолишига олиб келди. Олтинчи йилдирки, “ўткир озиқ-овқат танқислигининг юқори даражаси”га дуч келган одамлар сони ортмоқда.
Озиқ-овқат инқирозлари бўйича сўнгги глобал ҳисоботга кўра, кўрсаткич 295,3 миллион кишига етди. Бу 53 мамлакат аҳолисининг қарийб чорак қисмини — 22,6 фоизини ташкил этади. Уларнинг 95 фоиздан ортиғи Ғазо сектори ёки Суданда истиқомат қилади. Гаити, Мали ва Жанубий Суданда ҳам худди шундай озиқ-овқат танқислиги кузатилмоқда.
Суданда фуқаролар урушининг кучайиши расман очарчилик эълон қилинишига олиб келди, 24 миллиондан ортиқ киши ўткир озиқ-овқат танқислигига дуч келди.
Март ойи бошида Ғазо секторига барча ўтиш йўллари ёпилгани ва икки ойлик ўт очишни тўхтатиш режими барбод бўлганидан сўнг, озиқ-овқат маҳсулотларига кириш жиддий чекланди, дейилади хабарда.
Ғазонинг 2,1 миллионга яқин аҳолиси Исроилнинг гуманитар ёрдам блокадаси давом этар экан, очарчиликнинг “критик хавфи” остида қолди. Экспертлар 19 та мамлакатда, жумладан. Мьянма, Нигерия ва Конго Демократик Республикасидаги можаролар туфайли озиқ-овқат хавфсизлиги ёмонлашганини аниқлади.
Иқлим инқирози сабабли Эфиопия, Кения, Сомали, Афғонистон ва Покистонда қурғоқчилик шароитининг ёмонлашиши кутилаётгани вазиятни янада оғирлаштирмоқда. USAID томонидан молиялаштиришнинг тўхтатилиши Судан, Ямайка ва Гаити каби давлатларда 14 миллиондан ортиқ болаларга мўлжалланган озиқ-овқат хизматларини тўхтатиб қўйди. Бу эса уларни оғир қашшоқлик ва ўлим хавфига дучор қилмоқда.
Изоҳ (0)