Ҳар бир уй бекаси учун ошхонадаги тозалик ва гигиена жуда муҳим. Идиш-товоқ ювишда тозалаш воситалари қаторида энг кўп ишлатиладиган буюмлардан бири губкалардир. Аммо сўнгги пайтларда мутахассислар губкалардан фойдаланишнинг зарарли жиҳатларига эътибор қаратиб, уларнинг саломатлигимизга таъсири ҳақида огоҳлантирмоқда. Ҳақиқатан ҳам идиш-товоқ ювиш губкаси биз ўйлагандек хавфсизми? Ошхонадаги гигиенани таъминлашда бу воситадан қандай фойдаланиш керак? Шу каби саволларга жавоб излаб, мавзуга чуқурроқ назар ташлаймиз.
Идишларни ювиш учун губкадан фойдаланиш соғлиқ учун хавфлидир, дейди Норвегия озиқ-овқат тадқиқотлари институти тадқиқотчиси Тронд Мёретро. Унинг сўзларига кўра, ювиш пайтида губка ичидаги зарарли бактериялар идишларнинг юзасига тарқалади. Пиёлангиз тоза кўринса ҳам, кўплаб бактерияларни ўзида сақлаши мумкин. Чунки губкалар камдан-кам ҳолларда қуруқ сақланади, ҳар куни ишлатилади ва нам муҳитда турли замбуруғ ва бактериялар ривожланади. Шунинг учун ҳатто салмонеллёзга олиб келадиган хавфли бирикмалар кўпайиши учун қулай масканига айланади, деб ёзади Mirror.
“Бир дона губка бутун ер юзидаги инсоният сонидан ҳам кўпроқ бактерияларни ўзида сақлаши мумкин, чунки унда қолиб кетган озиқ-овқат зарралари бактериялар учун озуқа манбаи ҳисобланади”, дейди Тронд.
Губкани доимий тозалаб юриш ҳам хавфни сезиларли камайтирмайди, тўлиқ гигиенани сақлаб қолишнинг ягона йўли губкани ҳар куни алмаштиришдир. Аммо бу усул тежамкор эмас ва экологик жиҳатдан қулай ҳам эмас.
Ундан бўлса, идишларни нима билан тозалаш лозим?
Олим идишларни ювиш учун махсус чўткадан фойдаланишни тавсия қилади. Чунки у озиқ-овқат қолдиқларини яхши тозалайди, чўтканинг толалари жуда тез қурийди, зарарли бактериялар ҳам нобуд бўлади. Бундан ташқари, аксарият чўткаларда тутқич бўлади, улар қўлдаги зарарли бактериялар билан тўғридан-тўғри алоқа қилишига йўл қўймайди.
Шунингдек, чўтка гигиеник нуқтаи назардан идишларни ювиш учун энг яхши танловдир.
Изоҳ (0)