Ҳиндистон бош вазири Нарендра Моди Россия президенти Владимир Путин ҳамда Украина раҳбари Владимир Зеленскийга ўзаро мулоқотни тўғридан-тўғри ташкил қилган ҳолда музокаралар олиб боришни таклиф этди, дея хабар берган The Times of India.
«Россия президенти Путин ва Украина давлат раҳбари Зеленскийга музокараларни тўғридан-тўғри олиб боришни таклиф қилдим», — деган Моди.
Ҳиндистон ҳукумати раҳбари агар ушбу музокаралар амалга ошса, Россия ва Украина низоси тинчлик йўли билан ҳал этилишига умид қилиш мумкинлигини таъкидлаган.
Март бошида Моди ва Путин телефон орқали суҳбатлашган, суҳбат вақтида Ҳиндистон ҳукумати раҳбари Россия ҳамда Украина ўртасида бошланган тинчлик учун музокараларни олқишлаган, бу орқали ҳарбий низога барҳам берилиши мумкинлигига умид қилишини қайд этганди.
Шунингдек, Ҳиндистон бош вазири Путиннинг Зеленский билан бевосита мулоқоти давом этаётган тинчлик йўлидаги ҳаракатларга янада кучли туртки бериши ҳақида гапирган.
Зеленский 4 апрелда Киевнинг Москва билан тинчлик келишувига эришиш юзасидан муҳокамаларни давом эттириши, сабаби Украинада тинчлик ўрнатиш жуда муҳим вазифа эканлигини билдирган. У Россия билан музокара олиб борадиган делегация таркибини белгилайдиган фармонни ҳам имзолаганди. Шунингдек, Украина президенти Россиядаги ҳамкасби билан учрашув ўтказиши мумкинлигига шаъма қилган.
Кремль Зеленский ва Путин Россия ҳамда Украина делегациялари якуний ҳужжатни келишиб олганидан кейин учрашиши мумкин деб ҳисобламоқда.
Зеленский февраль охирида Озарбайжон президенти Илҳом Алиев ва Туркия президенти Ражаб Тоййиб Эрдўғон унга низони ҳал этиш учун Путин билан музокараларга шароит яратишга тайёрлигини маълум қилгани ҳақида баёнот берган. Шунингдек, Қозоғистон ҳам Украинадаги урушни тўхтатиш бўйича воситачиликни таклиф этган.
Венгрия бош вазири Виктор Орбан Владимир Путин билан телефон сўзлашувида Россия президентига Венгрияда нафақат Зеленский, балки Франция раҳбари Эммануэль Макрон билан ҳам тинчлик музокаралари учун шароит яратиб бериши мумкинлигини айтган.
Изоҳ (0)