Суриянинг Сувайда шаҳрини ҳукумат қўшинлари тарк этганидан сўнг номаълум қуролли гуруҳлар араб бадавий кўнгиллиларини оммавий равишда қатл этди. Бу ҳақда SАNА ахборот агентлиги маълум қилди.
Агентликнинг жойлардаги манбаларига кўра, шаҳарнинг шарқий қисмидаги ал-Микуас туманида тинч аҳоли, жумладан аёллар ва болалар оммавий тарзда ўлдирилган. Ушбу ҳужумлар оқибатида ҳалок бўлганлар ва жабрланганларнинг аниқ сони ҳозирча номаълум.
Таъкидланишича, тирик қолган бадавийлар янги ҳужумлар таҳдидидан сўнг яшаш жойларини шошилинч тарк этмоқда.
Ўз навбатида, Суриянинг Аl Watan газетаси Сувайдадаги тартибсизликлар ортида Исроил билан яқинлашишни ёқловчи ва яқинда Дамашқ ҳукуматига итоат этмасликка даъват қилган радикал друз шайхи Ҳикмат ал-Ҳажарий тарафдорлари турганини таъкидламоқда.
Сурия жанубидаги вазият 13 июль куни аҳолисининг аксарияти друзлардан иборат бўлган Сувайда вилоятида араб қабилалари кўнгиллилари ва друзларнинг ўзини ўзи мудофаа қилиш отрядлари ўртасида тўқнашувлар бошланиши билан кескинлашди. 15 июль куни Сурия армияси вилоятнинг шу номдаги маъмурий марказига кириб, вазиятни барқарорлаштириш мақсадида уни тозалашга киришди. Кўп ўтмай Исроил Сурия Қуролли кучлари ҳарбий колонналарига зарба бера бошлади. Буни у вилоятнинг друз аҳолисини ҳимоя қилиш истаги билан асослади ва 16 июль куни Сурия пойтахтидаги бир нечта стратегик объектларни ўққа тутди.
Шундан сўнг Сурия Мудофаа вазирлиги ўт очишни тўхтатиш бўйича эришилган келишувга мувофиқ, барча ҳарбий кучларни Ас-Сувайда шаҳридан олиб чиқилганини эълон қилди. Баёнотда айтилишича, қўшинлар шаҳарни ноқонуний гуруҳлардан тозалаш якунланганидан сўнг Сувайдани тарк этган, энди уни полиция кучлари назорат қилади. Друзларнинг диний раҳбари шайх Юсуф Жарбуъа, Ҳикмат ал-Ҳажарийдан фарқли ўлароқ, ҳарбий ҳаракатларни бутунлай тўхтатиш тўғрисидаги келишувни маъқуллаган.
Изоҳ (0)