Украина президенти Владимир Зеленский Россия 30 кунлик оташкесимга рози бўлмаса ҳам, 15 май куни Истанбулга боришга қарор қилди. Бу ҳақда украиналик амалдорга таяниб Axios хабар берди.
Қотилликни чўзишдан маъно йўқ. Владимир Путинни пайшанба куни (15 май) Туркияда кутаман. Шахсан. Умид қиламанки, россияликлар бу сафар баҳона изламайди, деб ёзган Украина президенти.
Путин 15 май куни Истанбулда Украина билан тўғридан тўғри музокараларни бошлашни таклиф қилганди. Бироқ Россия 30 кунлик сулҳни бошлаш учун Ғарб давлатлари Киевга қурол етказиб беришни тўхтатиши кераклигини айтмоқда. Акс ҳолда, Украина бу даврдан сафарбарлик, ротация, янги жангчиларни тайёрлаш ва мавжуд кучларини тиклаш учун фойдаланишини даъво қилган.
АҚШ президенти Дональд Трамп эса Украинада Москва билан тинчлик мулоқотини бошлашни талаб қилган.
Улар ҳеч бўлмаганда келишув имкониятини аниқлай олади. Агар бу имконсиз бўлса, Европа раҳбарлари ва АҚШ вазиятдан хабардор бўлиб, тегишли чоралар кўради!... Мен Украинанинг Путин билан келишувга боришига шубҳа қила бошладим. Путин эса Америка Қўшма Штатлари ёрдамисиз ҳеч қачон ғалаба қозониши мумкин бўлмаган Иккинчи жаҳон урушидаги ғалабани нишонлаш билан овора. УЧРАШИНГ, ҲОЗИРОҚ!, деган у.
Зеленскийнинг Путин билан учрашиш чақириғи айнан мазкур баёнотдан сўнг янграган. Туркия президенти Ражаб Тоййиб Эрдўғон 11 май куни Россия президенти билан мулоқотда музокараларни ташкиллаштиришни қўллаб-қувватлаганди.
Изоҳ (0)